डिचोली: गेल्या जवळपास पंधरा दिवसांपासून वाहतुकीसाठी बंद असलेला मये तलावाकडील रस्ता अखेर शुक्रवारपासून वाहतुकीसाठी खुला करण्यात आला.

हा रस्ता वाहतुकीसाठी खुला करण्यात आला असला, तरी सध्या केवळ दुचाकी आणि चारचाकी वाहनांना या रस्त्यावरून ये-जा करता येणार आहे, तर अवजड वाहनांना वाहतुकीसाठी हा रस्ता तूर्त बंदी आहे.

जागतिक पर्यटन स्थळ असलेल्या मये तलावाकडील रस्त्याखालील बांधाच्या दुरुस्तीकामानिमित्त गेल्या ७ मे रोजीपासून मये तलावाकडील श्री तळेश्वर मंदिरासमोरून जाणारा रस्ता वाहतुकीसाठी बंद ठेवण्यात आला होता. सुरक्षिततेच्या दृष्टीने तसा आदेशही उत्तर गोवा जिल्हाधिकाऱ्यांनी दिला होता.

मये तलावावरील रस्ता वाहतुकीसाठी बंद करण्यात आल्याने नार्वे तसेच चोडणहून कावळे रानमार्गे डिचोली आणि डिचोलीहून नार्वे आणि चोडणच्या दिशेने जाणाऱ्या वाहनांना गेले पंधरा दिवस पर्यायी मार्गाने वाहतूक करावी लागत होती. त्यामुळे वाहनचालकांची काहीसी गैरसोय झाली होती.

दरम्यान, हा रस्ता लवकरात लवकर वाहतुकीसाठी खुला करण्यात यावा, अशी मागणी स्थानिकांसह इतर नागरिकांनी केली होती.

‘वाहनचालकांनी काळजी घ्यावी’

मयेचे आमदार प्रेमेंद्र शेट यांनी आज मये तलावावरील बांधाच्या कामाची पाहणी करून कामाबाबत समाधान व्यक्त केले. या बांधाचे बहुतांश काम पूर्ण झाले असून जनतेची गैरसोय लक्षात घेवून बंद असलेला मये तलावाकडील रस्ता आता दुचाकी आणि चारचाकी वाहनांसाठी खुला करण्यात आल्याची माहिती त्यांनी दिली.

सध्या या बांधाचे काम अंतिम टप्प्यात आहे. तूर्त रस्ता वाहतुकीसाठी खुला करण्यात आला असला, तरी वाहनचालकांनी सहकार्य करावे. वाहने हाकताना वाहनचालकांनी काळजी घ्यावी. वाहने सावकाश हाकावी, असे आवाहन आमदार शेट यांनी केले आहे.