म्हापसा: मयडे येथे दोन घरे फोडून अनोळखी चोरट्यांनी नळाचे टॅप व इतर वस्तू मिळून पावणेतीन लाखांचा ऐवज लंपास केला. या प्रकरणी संशयावरून म्हापसा पोलिसांनी गदग येथील तीन महिलांना अटक केली.

अटक केलेल्या संशयित महिलांमध्ये सरोजा अशोक पवार (रा. गिरी), सुभव्वा ईश्वर लमाणी (रा.गिरी) व रेणूका सदानंद चिक्रे (रा. माडेल थिवी) यांचा समावेश आहे. त्या भंगार गोळा करण्याचे काम करतात.

रविवारी ६ रोजी सकाळी भंगार गोळा करण्यासाठी फिरणाऱ्या या महिलांचा गावात होणाऱ्या चोऱ्यांमध्ये हात असल्याच्या संशयावरून लोकांनी संशयित महिलांना पकडले व नंतर त्यांना पोलिसांच्या स्वाधीन केले.

या दोन्ही चोरीच्या घटना १ ते ४ ऑक्टोबर दरम्यान घडलेल्या. पिराझोना मयडे येथे रॉडनी रॉड्रिग्ज यांच्या घराचा मागचा लाकडी दरवाजा तोडून आत शिरकाव केला. घरातील सर्व नळाचे टॅप, सोन्याचा मास्कोट, कॅमेरा व लॅपटॉप अशा सुमारे २ लाखांच्या वस्तू चोरल्या.

घराचे मालक हे परदेशात असतात. घराचे काळजीवाहू लवू कुबल यांनी या प्रकरणी पोलिसांत तक्रार दिली. मंगळवार १ रोजी ते घर बंद करून गेले होते. तर शनिवारी ५ रोजी ते सकाळी घरी परतले. तेव्हा हा चोरीचा प्रकार निदर्शनास आला.

बांबुर्डेत चोरी

बांबुर्डे-मयडे येथील शांती भर्तू यांचे बांधकाम सुरू असलेले घर अज्ञात चोरट्यांनी फोडले व आतील ७० हजारांचे नळाचे टॅप चोरून नेले. भर्तू यांच्या या घराचे बांधकाम पूर्णत्वाकडे आहे. त्यांच्या घरातील सर्व नळांचे फक्त टॅप चोरांनी चोरून नेले.