सासष्टी: मडगाव येथील एसजीपीडीए किरकोळ मासळी तसेच भाजी मार्केटमधील व्यापाऱ्यांना आता आखून दिलेली जागेतच व्यापार करावा लागणार आहे. अन्यथा सोमवारपासून कारवाईला सामोरे जावे लागेल, असे एसजीपीडीएचे अध्यक्ष दाजी साळकर यांनी बजावले आहे.

येथील व्यापारी आखून दिलेली जागा सोडून गिऱ्हाईकांना फिरण्यासाठी जी मोकळी जागा ठेवली आहे तिथे आपले साहित्य ठेवतात. त्यामुळे मार्केटमध्ये फिरणे कठीण होते. तसेच भाजी विक्रेते शिल्लक भाजी तिथेच टाकून देण्याचे प्रकार घडत आहेत.

दोन दिवसांपूर्वी एसजीपीडीएने या सर्व व्यापाऱ्यांना नोटीस पाठवून स्वच्छता राखण्याचे तसेच केवळ आपल्या जागेवरच धंदा करण्याचा आदेश दिला होता. शुक्रवारी साळकर यांनी अधिकाऱ्यांसमवेत या मार्केटची प्रत्यक्ष पाहणी केली. ते व्यापाऱ्यांशी बोलले व सोमवारपासून दिलेला आदेश काटेकोरपणे पाळावा अन्यथा कारवाईस सामोरे जावे लागेल असे सांगितले.

संपूर्ण मार्केटचे नूतनीकरण करणार

या मार्केटच्या संपूर्ण नूतनीकरणाचा विचार आहे. त्याचा आराखडा तयार केला जाईल व सरकारच्या मंजुरीनंतर कामाला सुरवात केली जाईल, असेही साळकर यांनी सांगितले.