Criminal cases Goa 2025

मडगाव: रोडरेजवरून दोन सख्ख्या भावांना मारहाण करण्याची घटना बुधवारी मडगावच्या जुन्या हॉस्पिसियो नजीक घडली. संशयितांनी सुरुवातीला राशिद अली यांना मारहाण केली, त्याला वाचविण्यासाठी शाकीद अली हा आला असता, त्यालाही बेदम मारहाण केली. त्यानंतर संशयित पळून गेले. सध्या त्यांचा शोध चालू असल्याचे फातोर्डा पोलिसांनी सांगितले.

दोघे संशयित दुचाकीवरून आले होते. त्यांनी राशिद अली याच्या दुचाकीसमोर गाडी घालत त्याला अडवले. त्यानंतर गाडी लावल्याचे कारण देत त्याला मारहाण करण्यास सुरुवात केली.

राशिद जीवाच्या आकांताने नजीकच्या आरोग्य केंद्राच्या इमारतीत लपला व त्याने पोलिसांना कॉल केला. त्यानंतरही संशयितांनी आणखी काहींना बोलावून घेत आरोग्य केंद्रातील सिलिंडर राशिदच्या डोक्यावर हाणला.

राशिदने दिलेल्या माहितीनुसार, चार ते पाचजणांनी मारहाण केली. त्यांच्याकडे चाकूही होता व त्यांनी मारण्याचा प्रयत्न केला.