Margao News: मडगाव येथील गांधी मार्केटमधील व्यापाऱ्यांनी आज, मंगळवारी मडगाव पालिकेवर मोर्चा काढला. यावेळी मुख्याधिकारी आणि नगराध्यक्ष अनुपस्थित होते. त्यामुळे चिडलेल्या व्यापाऱ्यांनी माजी उपमुख्यमंत्री बाबू आजगावकर यांच्या सह प्रवेशद्वारावरच ठिय्या मांडला. दरम्यान, यावेळी बाहेरून येणारी तांबडी भाजी मार्केटमध्ये विकू देणार नाही, असे बाबू आजगावकर यांनी सांगितले.

पोलिसांनी सर्व आंदोलकांना तिथेच अडवून धरले होते. बराच वेळ तिथे गोंधळ सुरू होता. आंदोलकांकडून घोषणाबाजीही करण्यात आली. सर्व आंदोलक व्यापारी नगराध्यक्ष आणि मुख्याधिकाऱ्यांच्या प्रतिक्षेत तिथेच काहीकाळ ठिय्या मांडून होते.

या वेळी गांधी मार्केट असोसिएशनच्या या व्यापाऱ्यांनी मुख्य प्रवेशद्वारच अडवून धरले. नगराध्यक्ष आणि मुख्याधिकारी जोवर शिष्टमंडळाची भेट घेत नाहीत तोवर येथून हलणार नसल्याचा पवित्रा त्यांनी घेतला.

काही वेळाने नगराध्यक्ष आणि मुख्याधिकारी आल्यानंतर त्यांच्या कक्षात शिष्टमंडळाने त्यांची भेट घेतली. यावेळी मार्केटमधील अतिक्रमणे काढा, स्वच्छता ठेवा, रिनोव्हेशन करा, अवैध प्रकार थांबवा, बाहेरून येणारी फुले विक्री करू देण्यास बंदी घाला इत्यादी मागण्या करण्यात आल्या.

आजपासून मार्केटमध्ये गोव्याच्या बाहेरून येणारी तांबडी भाजी विकली जाणार नाही. केवळ गोव्यातील तांबडी भाजीच मार्केटमध्ये विकली जाईल, असे बाबू आजगावकर यांनी सांगितले.

मडगावचे नगराध्यक्ष दामोदर शिरोडकर यांनी शिष्टमंडळाचे म्हणणे ऐकून घेतले आणि बेकायदेशीर जे काही असेल त्यावर कारवाई करतो, तसचे मार्केट रिनोव्हेशनचे प्लॅन आखला जात आहे, असे स्पष्ट केले.