मडगाव : लाच प्रकरणातील निलंबित पोलिस निरीक्षक सुनील गुडलर आणि पोलिस शिपाई मोहम्मद हुसेन या दोघांच्या जामीन अर्जावर शुक्रवार, २ मे रोजी निवाडा होणार आहे. या दोघांच्या पोलिस कोठडीत तीन दिवसांची वाढ करण्यात आली आहे.  

अतिरिक्त सत्र न्यायालयाच्या न्यायाधीश विजया आंब्रे यांच्या न्यायालयात बुधवारी  हा जामीन अर्ज सुनावणीस आला असता, निवाड्याची प्रत तयार झाली नसल्याने पुढील तारीख दिली. 

बेळगाव येथील एका मटण व्यापाऱ्याला गोव्यात मांसपुरवठा केल्याच्या खोट्या प्रकरणात फसवून त्याच्याकडून दोन लाखांची लाच व दरमहा २५ हजार रुपये हफ्त्याची मागणी केल्याप्रकरणी या दोघांना लाचलुचपत प्रतिबंधक विभागाने  सोमवार, २१ रोजी अटक केली होती.

३० मार्च रोजी गोवा एक्स्प्रेस रेल्वेने मडगावात आलेले बीफ रेल्वे पोलिसांनी जप्त केले होते. नंतर बेळगाव येथील एका मटण विक्रेत्याला धमकावून त्याच्याकडून लाच मागण्याचा प्रकार घडला होता. त्या व्यापाऱ्याने याबाबत ‘एसीबी’कडे तक्रार केली होती.

‘या’ कारणास्तव जामिनाला आक्षेप

मागच्या सुनावणीवेळी या जामीन अर्जाला सरकार पक्षाने विरोध करताना गुडलरवर यापूर्वीही दोन गंभीर स्वरूपाचे गुन्हे नोंद असल्याचे सांगताना, त्याची पोलिस कोठडीत चौकशी करणे गरजेचे असल्याचे म्हटले होते.

मोहम्मद हुसेन  हा तपासकामात सहकार्य करीत नाही. त्यामुळे त्याच्या चौकशीसाठी त्याची कोठडी आवश्यक आहे. तो पोलिस शिपाई असल्याने जामीन मिळाल्यास साक्षीदारावर दबाव आणू शकतो, तक्रारीत फेरफार करू शकतो. सबब त्याला जामीन देऊ नये, असे  म्हणणे न्यायालयात मांडले होते.