म्हार्दोळ पोलिसांनी मडकई येथील आयडीसीजवळ 241 ग्राम गांजा बाळगल्याप्रकरणी कारवाई केली आहे. पोलिसांनी हेरंब दिलीप नाईक या 22 वर्षीय तरुणाच्या मुसक्या आवळल्या. हेरंब हा दासोळवाडा, कुंडई येथील रहिवासी आहे. याशिवाय, त्याच्याकडून स्कूटरही जप्त करण्यात आली. पोलिस निरिक्षक योगेश सावंत यांच्या मार्गदर्शनाखाली उपनिरिक्षख अभिलाष नाईक यांनी ही कारवाई केली.

दरम्यान, म्हार्दोळ पोलिसांना मडकई येथील आयडीसीजवळ शुक्रवारी (16 ऑगस्ट) सकाळी 5.40 वाजण्याच्या सुमारास एक तरुण स्कूटर घेऊन फिरताना दिसला. पोलिसांनी त्याची झडती घेतली असताना त्याच्याकडून तब्बल 241 ग्राम गांजा आढळून आला. पोलिसांनी त्याची स्कूटरही जप्त केली. पोलिसांनी दिलेल्या माहितीनुसार, जप्त केलेल्या गांजाची किंमत तब्बल 24 हजार 100 रुपये आहे. म्हार्दोळ पोलिस (Police) याप्रकरणी अधिक तपास करतायेत.

रशियन नागरिकाला अटक!

अमली पदार्थ गांजा जवळ बाळगल्याप्रकरणी गोवा पोलिसांनी रशियन नागरिकाला अटक केली. बुधवारी (14 ऑगस्ट) पेडणे तालुक्यातील सातेरी मंदिराजवळ ही कारवाई करण्यात आली. पोलिसांनी दिलेल्या माहितीनुसार, अमली पदार्थ विरोधी पथक, पणजी गोवा यांच्या वतीने मराठावाडा, मांद्रे येथील सातेरी मंदिराजवळ छापा टाकला.

पथकाने 42 वर्षीय रशियन नागरिक कोंस्टाटीन मार्जर्ली याला गांजा हा अमली पदार्थ जवळ बाळगल्याप्रकरणी अटक केली. त्याच्याकडे दोन प्रकारचे अमली पदार्थ आढळून आले. 29 व 500 ग्रॅम वजनाचा एक लाख 66 हजार किमतीचा गांजा पोलिसांनी जप्त केला आहे.