Tarak Arolkar Disqualified: म्हापसा नगरपालिकेचे प्रभाग क्रमांक सात मधील नगरसेवक तारक आरोलकर यांचा जातीचा दाखला रद्द झाल्याने त्यांचे पद धोक्यात आले होते. आता नगरविकास खात्याने त्यांना अपात्र ठरवले आहे. तसे आदेश विभागाच्या संचालकांनी काढला आहे.

माजी नगरसेवक फ्रँकी कार्व्हालो यांनी समाजकल्याण विभागाच्या तीन सदस्यीय छाननी समितीकडे आरोलकर यांच्या जातीच्या दाखल्याबाबत तक्रार केली होती.

समाज कल्याण विभागाच्या छाननी समितीच्या निर्देशानंतर आरोलकर यांचा जातीचा दाखला बार्देश उपजिल्हाधिकारी गुरुदास देसाई यांनी रद्द केला होता. यानंतर आता आरोलकर यांना अपात्र ठरविण्यात आले आहे.

एप्रिल 2021च्या म्हापसा पालिका निवडणुकीत आरोलकरांनी ओबीसीचे खोटे प्रमाणपत्र सादर करुन ही निवडणूक लढवली होती. त्यानंतर, म्हापसा पालिकेच्या प्रभाग 7 मधून आरोलकर ओबीसी आरक्षित प्रभागातून जिंकून आले होते.

छाननी समितीने निवाडा देताना म्हटले होते की, "म्हापसा पालिकेचे नगरसेवक तारक आरोलकर यांनी सादर केलेले कथित ओबीसी प्रमाणपत्र हे पडताळले गेले नाही. त्यामुळे बार्देश उपजिल्हाधिकार्‍यांनी सदर प्रमाणपत्र रद्द करावे."