म्हापसा, ता. १३ (प्रतिनिधी): ऑनलाइन फसवणुकीत म्हापशातील ४७ वर्षीय केव्हिन सिमोईस यांना १ लाख २ हजार १७८ रुपयांचा गंडा घातल्याचा प्रकार उघडकीस आला.

फेर-आल्त- म्हापसा येथील अल्कॉन कॉलनीत राहणाऱ्या सिमॉईस यांच्याशी ७ ऑगस्ट रोजी सकाळी अज्ञात व्यक्तीने संपर्क साधला. फसवणुकीच्या उद्देशाने संवाद साधून त्यांच्या बँक खात्यातून १,०२,१७८ रुपये बेकायदेशीरपणे काढून घेण्यात आले.

याप्रकरणी सायबर गुन्हे पोलिस ठाण्याकडून प्राप्त ‘एफआयआर’च्या आधारे म्हापसा पोलिसांनी भारतीय न्याय संहिता, २०२३ मधील कलम ३१८ अंतर्गत अज्ञात संशयिताविरुद्ध गुन्हा दाखल केला आहे. पोलिस उपनिरीक्षक अजय धुरी यांच्या मार्गदर्शनाखाली पुढील तपास सुरू आहे.