चाररस्ता ते माशे पर्यंतच्या बगल मार्गाला स्व. मनोहर पर्रीकर (Manohar Parrikar) यांचे नाव देण्यात आले असून, सद्यःस्थितीत या बगल मार्गाची वाताहत बनली आहे. कंत्राटदाराने निकृष्ट दर्जाचे काम केल्याचा संशय असून, या कामाची चौकशी व्हावी, अशी येथील लोकांची मागणी आहे.

मनोहर पर्रीकर बगल चारपदरी रस्त्यावरील पुलाला तडे गेलेल्या जोडणीचे दुरूस्ती सुरू झाली असली तरी यापूर्वी सहा महिन्यामागे या जोडणीची दुरूस्तीचे काम कंत्राटदार एम. व्ही. आर. कंपनीने केले होती. परंतु केवळ सहा महिन्यांत जोडणी उखडल्याने कामावर संशय घेतला जात आहे.

या बगल रस्त्याचे बांधकाम (construction) निकृष्ट दर्जाचे झाले असल्याची तक्रार लोकांकडून वारंवार करण्यात येत होती. तरीही संबंधित कंत्राटदाराकडून दुर्लक्ष केले जात होते, असे लोकांचे म्हणणे आहे.

रस्त्यावर काळोख... स्व. मनोहर पर्रीकर बगल रस्त्यांवरील पथदीपांची दुरवस्था झाली आहे. पथदीप खांबावरून लोंबकळू लागले आहेत. त्यामुळे बगल रस्त्यावर काही ठिकाणी काळोखाचे साम्राज्य पसरले आहे. या रस्त्यावर मोकाट गुरांमुळे वारंवार अपघात होत आहेत.