पणजी: येथील आयकर कार्यालयातील महिला कर्मचारी लैंगिक अत्याचारप्रकरणातील मख्य संशयित असलेला आयकर निरीक्षक मनिंदर सिंग अत्तारी याचा अटकपूर्व जामीन अर्ज द्रुतगती न्यायालयाने फेटाळला. या गुन्ह्याच्या सखोल चौकशीसाठी संशयिताची कोठडी आवश्‍यक आहे, असे निरीक्षण न्यायालयाने नोंदवले आहे.

पीडित महिलेने पणजी पोलिस स्थानकात दिलेल्या तक्रारीत मनिंदर सिंग अत्तारी याने तिला मोबाईलवरून व्हॉटस्अपवर पाठविलेले अश्‍लिल संदेश याची माहितीच तक्रारीत सोबत जोडली आहे. त्याशिवाय तो मोबाईल त्याचाच असल्याचा पुरावा पोलिसांनी सुनावणीवेळी सादर केला.

तपासकाम प्राथमिक टप्प्यात असल्याने सीसी टीव्ही कॅमेरा फूटेज तसेच डीव्हीआर पोलिसांनी आयकर खात्याकडे मागितली आहे अजून मिळालेली नाही. संशयित आयकर कार्यालयात निरीक्षक पदावर असल्याने तो कार्यालयात पीडित महिलेबरोबर काम करणाऱ्यांवर दबाव व दडपण आणण्याची शक्यता असून तपासकामात अडथळा येऊ शकतो. या प्रकरणाची चौकशी करण्यासाठी त्याची पोलिस कोठडी आवश्‍यक असल्याचा युक्तिवाद सरकारी वकील सुषमा मांद्रेकर यांनी केला. त्यांनी मांडलेली बाजू न्यायालयाने उचलून धरत संशयिताचा अटकपूर्व जामीन फेटाळला.

दरम्यान, पीडित महिलेने इतर दोघा संशयितांविरुद्ध केलेले आरोप हे जामीनपात्र होते. त्यामुळे संशयित आदित्य वर्मा व दिपक कुमार या दोघांना न्यायालयाने कालच अटकपूर्व जामीन मंजूर केला होता. हे दोघेही अश्‍लिल टोमणे मारण्याबरोबरच वाईट नजरेने पाहत होते असे तक्रारीत नमूद केले होते.