डिचोली : धावत्या मोटारगाडीवर आंब्याची भलीमोठी फांदी कोसळण्याची घटना डिचोली-अस्नोडा रस्त्यावर घडली. हा अपघात बुधवारी पहाटे शिवोलकरवाडा-मुळगाव येथे घडला. सुदैवाने मोटारगाडीतील चालकासह दोघेजण सुखरूप बचावले. या मोटारीत म्हापसातील दोघेजण होते, अशी प्राथमिक माहिती मिळाली आहे.

या अपघातासंबंधी उपलब्ध झालेली माहिती अशी की, GA-03-6785 या क्रमांकाची मोटारगाडी अस्नोड्याच्या दिशेने जात होती. शिवोलकरवाडा-मुळगाव येथे समोरून येणाऱ्या MH-10- CR- 1224 या क्रमांकाच्या मालवाहू ट्रकच्या टपाची धडक आम्रवृक्षाच्या मोठ्या फांदीला बसली. त्याबरोबर फांदी मोडून मोटारगाडीच्या दर्शनी भागावर कोसळली. यात मोटारगाडीच्या दर्शनी भागाची मोडतोड झाली.

या घटनेत मोटारीचा चालक किरकोळ जखमी झाला. ही फांदी जर मोटारगाडीच्या टपावर कोसळली असती, तर मोठा अनर्थ घडला असता. डिचोली अग्निशमन दलाला घटनेची माहिती मिळताच दलाच्या जवानांनी फांदी हटवून रस्ता वाहतुकीस सुरळीत केला.