पणजी: गेल्या दोन आठवड्यांपासून भाज्यांचे दर समाधानकारक आहेत. कांदा, बटाटा, टोमॅटो यांचे दर एक महिन्यापासून स्थिर आहेत. काल महाशिवरात्रीनिमित्त सुट्टी असल्याने पणजी मार्केटमध्ये खरेदी करण्यासाठी ग्राहकांनी गर्दी केली होती. फुले व फळे घेण्यासाठी ग्राहकांनी गर्दी केली होती. गुलाब, मोगरीच्या माळा, फाती, हार आदीची मोठी विक्री झाली. पणजी मार्केटमध्ये काल तोतापुरी आंब्याचे आगमन झाले असून 80 रुपये प्रती नग व 200 रुपये प्रती किलो दराने त्यांची विक्री होत आहे.

कोरोनाच्या (COVID-19) तिसऱ्या लाटेच्या प्रभावामुळे ग्राहक बाजारात (Market) जाणे प्रामुख्याने टाळत होते. मात्र, आता पणजी (Panaji) मार्केटमध्ये ग्राहकांची वर्दळ वाढत असल्याचे दिसून येत आहे. मेथी, कारली, बिनीस व भेंडीचे दर वाढलेले आहेत. हिरवी मिरची 120 ते 140 रुपये प्रती किलो झाली आहे. तापमानात वाढ होत असल्याने संत्री, मोसंबी, कलिंगड, शहाळे, द्राक्षे आदी फळांना बाजारात चांगली मागणी आहे.