माजोर्डा धीरयो प्रकरणी तपासात महत्त्वाची कागदपत्रे अद्याप मिळाली नसल्याने पोलिसांना पुढील कारवाई करण्यात अडचणी येत आहेत. या प्रकरणात संशयित असलेले रवी आणि रेमंड हे दोघे भाऊ सध्या अमेरिकेत आहेत.

त्यांच्या पासपोर्ट क्रमांकांची माहिती पोलिसांना अद्याप मिळालेली नसल्याने ‘लुक आऊट’ नोटीस जारी करण्याची प्रक्रिया अडखळली आहे. या दोन्ही भावांवर गुन्हा नोंद झालेला असून, तपासासाठी त्यांची उपस्थिती आवश्यक आहे.

मात्र पासपोर्ट क्रमांकांशिवाय त्यांच्याविरुद्ध आंतरराष्ट्रीय पातळीवर कारवाई करणे शक्य नसल्याचे पोलिस सूत्रांनी सांगितले. दरम्यान, पोलिस विभाग विविध यंत्रणांकडून त्यांचे प्रवास आणि ओळख तपशील मिळविण्याचा प्रयत्न करत आहे.

या प्रकरणाची पार्श्वभूमी २२ सप्टेंबरची असून, माजोर्डा येथील धिरयो स्पर्धेदरम्यान उधळलेल्या रेड्याने गिरदोली येथील राजेश निस्तानी (वय ४२) यांना शिंगाने भोसकले होते. त्यांना तातडीने रुग्णालयात हलवण्यात आले होते पण त्यांचा या घटनेत दुर्दैवी मृत्यू झाला होता.

माजोर्डा येथील एका निर्जन शेतात बैलांची झुंज होणार असल्याचे सूत्रांकडून सांगण्यात आले होते. यासाठीच बैलाला येथे आणण्यात आले होते. त्याचवेळी ही धक्कादायक घटना घडली. बैलांच्या झुंजीचा खेळ गोव्याच्या काही भागात पारंपारिक मानला जातो, पण तो पूर्णपणे बेकायदेशीर आहे.