Goa Mainapi waterfall : मैनापी धबधब्यावर रविवारी सहलीसाठी गेलेले दोघेजण बुडाले होते. त्‍यातील जनार्दन सडेकर यांचा मृतदेह कालच हाती लागला होता. तर, शिवदत्त नाईक (28) या युवकाचा मृतदेह सोमवारी सकाळी साडेसातच्‍या सुमारास तेथेच तरंगताना आढळला.

या धबधब्‍यावर फोंडा एलआयसी कार्यालयातील एक तर वास्को येथून दुसरा गट आला होता. मूळ होडार- कुडचडे येथील पण सध्या वास्को येथे वास्तव्यास असलेला अभियंता शिवदत्त नाईक हा पाण्यात बुडत असल्याचे दिसताच म्हापसा येथील जनार्दन सडेकर यांनी त्‍याला वाचविण्यासाठी पाण्यात उडी घेतली.

परंतु पाण्‍याचा अंदाज न आल्‍याने दोघेही बुडाले. दरम्‍यान, मयत शिवदत्त नाईक याच्यावर होडार-कुडचडे येथील स्मशानभूमीत संध्‍याकाळी अंतिम संस्कार करण्यात आले.

वडिलांचाही दुर्घटनेतच झाला होता मृत्यू

शिवदत्त नाईक हा युवक मूळ होडर-कुडचडे येथील असला तरी कामानिमित्त तो वास्को येथे राहत होता. शिक्षणही तेथेच होऊन सिव्हिल अभियंता म्हणून खासगी आस्थापनात नोकरी करत होता.

त्याची घरची परिस्थिती हलाखीची असून आई दीर्घ आजाराचा सामना करीत आहे. महिनाभरापूर्वीच त्‍याच्‍या बहिणीचे लग्न झाले होते, तर वडिलांचा पंधरा वर्षांपूर्वी अशाच एका दुर्घटनेत मृत्यू झाला होता.

पाय घसरून पडला!

मयत शिवदत्त नाईक हा आंघोळीसाठी पाण्यात उतरला नाही तर तो पाय घसरून पाण्यात पडला होता. त्याच्या डोक्‍याला जखम झाल्याचे मृतदेह पाण्याबाहेर काढल्यानंतर दिसून आले.

अंगावरील कपडे आणि पायातील बूट तसेच होते. यावरून शिवदत्त पाय घसरून पाण्यात पडल्‍याचे स्‍पष्‍ट झाले.