मडगाव: युवकांना ताब्‍यात घेऊन मारहाण करण्‍याच्‍या प्रकरणात मायणा-कुडतरी पोलिसांची सर्वत्र छी-थू होत असतानाच आणखी दोघांना निलंबित करण्‍यात आले. समीर सुदिर (हवालदार) आणि पुंडलिक परीट (शिपाई) अशी त्‍यांची नावे आहेत.

दरम्यान, या प्रकरणाची गोवा राज्य मानवाधिकार आयोगाने स्वेच्छा दखल घेत दक्षिण गोव्याचे पोलिस अधीक्षक आणि मायणा-कुडतरी पोलिस निरीक्षक यांना १७ जून रोजी सकाळी १०.३० वाजता चौकशीसाठी उपस्थित राहण्याचे आदेश दिले आहेत.

दारूच्‍या नशेत आम्हाला नग्न करून बेदम मारहाण केली, अपमानास्पद वागणूक दिली, तंबाखू चघळून तोंडाचा वास घेण्यास भाग पाडले, मारहाणीचे मोबाईलवर चित्रीकरण केले, असे सनसनाटी आरोप मारहाण झालेल्‍या पीडित युवकांनी केले आहेत. ॲड. लिओना बार्रेटो यांनी पीडित युवकांसह पत्रकार परिषद घेतली. यावेळी त्‍यांनी वरील धक्कादायक आरोप केले. मारहाण करणाऱ्या पोलिसांनी फुटबॉल जर्सी परिधान केली होती, असेही त्‍यांनी सांगितले.

मानवाधिकार आयोगाचे अध्यक्ष न्यायमूर्ती भारत देशपांडे आणि सदस्य प्रमोद कामत यांनी हा आदेश जारी केला आहे. दक्षिण गोवा पोलिस अधीक्षक शेखर प्रभुदेसाई यांनी त्‍यास दुजोरा दिला.

६ जूनच्‍या रात्री रामनगरी-नेसाय येथे दोन गटांमध्ये झालेल्या मारहाणीनंतर चौघा युवकांना पोलिसांनी ताब्यात घेतले होते. त्यानंतर पोलिस ठाण्यात त्यांना बेदम मारहाण करण्‍यात आली. या प्रकरणातील प्राथमिक चौकशीत तथ्य आढळून आल्याने पोलिस शिपाई चेतन कोळी याला यापूर्वीच निलंबित करण्यात आले आहे.

पोलिस उपनिरीक्षक संकेत नाईक (ड्युटी अधिकारी), उपनिरीक्षक गौरव नाईक यांच्‍यावरही कडक कारवाई झाली पाहिजे तसेच या घटनेची चौकशी क्राईम ब्रँचकडे द्यावी, अशी मागणी ॲड. बार्रेटो यांनी केली.