Madgaon Mayor Election : राज्‍यातील पालिकांमध्‍ये यापुढे नगराध्‍यक्ष, उपनगराध्‍यक्ष निवड ही खुल्‍या पद्धतीनेही (हात उंचावून) होऊ शकणार आहे. त्‍या संदर्भात पालिका प्रशासनाने काढलेल्‍या वटहुकुमाला राज्‍यपाल पी. एस. श्रीधरन पिल्‍लई यांनी गुरुवारी रात्री उशिरा मंजुरी दिली. त्‍यानंतर कायदा खात्‍याने त्‍याची अधिसूचनाही जारी केली आहे. परिणामी मडगाव पालिका नगराध्‍यक्ष निवड ही खुल्‍या पद्धतीने होण्‍याचा मार्ग मोकळा झाला आहे. ही निवडणूक बुधवार, 12 ऑक्टोबर रोजी होईल, अशी माहितीही खात्रीलायक सूत्रांकडून मिळाली आहे.

गेल्‍या काही दिवसांपासून मडगाव पालिका नगराध्‍यक्ष निवड हा चर्चेचा विषय बनला होता. सरकारने ही निवड खुल्या पद्धतीने हात उंचावून घेता यावी, यासाठी कायद्यात दुरुस्ती करत वटहुकुमाची प्रक्रिया सुरू केली होती. त्‍यावर राज्‍यपालांकडून अखेर शिक्‍कामोर्तब झाले आहे. दरम्‍यान, नगरपालिका संचालक गुरुदास पिळर्णकर हे शुक्रवारी नगराध्‍यक्ष, उपनगराध्‍यक्ष निवड प्रक्रियेसाठी नोटीस जारी करण्याची शक्यता आहे. या निवडणुकीसाठी वित्त खात्याचे संयुक्त सचिव विकास गावणेकर यांची पुन्हा निर्वाचन अधिकारी म्हणून नियुक्ती केली जाणार असल्याची खात्रीलायक माहिती मिळाली आहे. त्यामुळे या निवडणुकीकडे राज्यातील लोकांचे लक्ष लागले आहे.

आमदार दिगंबर कामत हे भाजपमध्ये येऊनही नगराध्यक्ष पदाच्या निवडणुकीत त्यांचा उमेदवार पराभूत झाल्याने त्यांची नाचक्की झाली होती. त्यामुळे ही निवडणूक आता सत्ताधारी भाजपसाठी प्रतिष्ठेची बनली आहे. पालिका कायद्याच्या नियम 7 मध्ये दुरुस्ती करून त्याचा वटहुकूम काढण्यासाठी हल्लीच सरकारने मंत्रिमंडळातील मंत्र्यांना त्याचा मसुदा पाठवून मंजुरीसाठी सह्या घेतल्या होत्‍या.

मडगाव पालिकेत भाजपकडे 15 नगरसेवकांचे स्पष्ट बहुमत असतानाही त्यांना आपला उमेदवार जिंकून येणार, याची अजूनही खात्री नाही. अशातच कामत गटाचे नगराध्यक्ष पदाचे दावेदार दामोदर शिरोडकर यांना पाठिंबा देण्यास भाजपच्या काही नगरसेवकांनी विरोध दर्शविला आहे. यासाठीच आता पक्षाचा बडगा दाखवून हात दाखवून खुलेपणाने त्यांच्याकडून मतदान करून घेणे, हा एकमात्र उपाय सरकारकडे उरला होता. त्यासाठीच सरकारने खटाटोप करून कायद्यात बदल करणारा वटहुकूम जारी केला आहे.