मडगाव: मतदारांमध्ये पर्यावरण जतनाविषयी जागृती व्हावी यासाठी निवडणूक आयोगाने विधानसभा निवडणूक मतदानावेळी ‘पर्यावरण स्नेही’ प्रभाग स्पर्धा घेतली होती. या स्पर्धेचा पुरस्कार कुडचडे मतदारसंघातील 21 क्रमांकाच्या माड-बाणसाय प्रभागाला प्राप्त झाला आहे.

केपे येथे नुकत्याच झालेल्या एका समारंभात उपजिल्हाधिकारी निलेश धायगोडकर यांच्या हस्ते प्रभागस्तरीय अधिकारी अनिल सावंत देसाई यांनी हा पुरस्कार स्वीकारला. यावेळी केपेच्या संयुक्त मामलेदार व कुडचडे मतदारसंघाच्या सहनिर्वाचन अधिकारी आवेलीना परेरा आणि अन्य कर्मचारी उपस्थित होते.

नैसर्गिक वस्तूंचा वापर:

हे पर्यावरण स्नेही प्रभाग पूर्णतः नैसर्गिक वस्तू वापरून तयार करण्यात आले होते. ज्यात अन्य कुठल्याही अनैसर्गिक वस्तूंचा वापर करण्यात आला नव्हता. त्यामुळे तिथे मतदान करण्यास आलेल्या मतदारांनाही आपण निसर्गाच्या सान्निध्यात असल्याचा भास होत होता.