Panjim: ऑफिसमधील एक तरुण सहकारी युवतीच्या प्रेमात पडला. मात्र तिने त्याला दाद न दिल्याने तिची बदनामी करण्याचा प्रयत्न केला. इंटरनेटवरून अश्‍लिल छायाचित्र काढत सहकारी युवतीच्या चेहऱ्याचा फोटो त्याला लावून ते व्हायरल केले. मात्र, हे कृत्य या आवारा मजनूला चांगलेच अंगलट आले असून सध्या तो पोलिस कोठडीची हवा खात आहे.

सुभाष सुरेश म्हापसेकर (29) असे संशयिताचे नाव आहे. ऑफिसमधील युवतीने त्याच्या प्रेमास नकार दिल्याने त्याने तिच्या नावाने फेक इस्टाग्राम अकाऊंट तयार केले. त्याद्वारे इंटरनेटवरून अश्‍लिल छायाचित्रांना युवतीचा चेहरा क्रॉप करून तो व्हायरल करू लागला. ही बाब युवतीच्या लक्षात येताच तिने अज्ञाताविरोधात सायबर कक्षात तक्रार दाखल केली.

पोलिसांनी अत्याधुनिक तंत्रज्ञानाच्या सहाय्याने शोध घेतला असता संशयित हा तिच्या ऑफिसमधील असल्याचे समजले. हे पाहून त्या युवतीला धक्काच बसला. दरम्यान, पोलिसांनी संशयितावर माहिती तंत्रज्ञान कलम 66सी, 67 तसेच 67 अ खाली गुन्हा दाखल करून अटक केली. महिला पोलिस निरीक्षक रिमा नाईक यांच्या नेतृत्वाखालील पोलिस पथकाने ही कारवाई केली.