Fire News:

सत्तरी तालुक्यात गेल्या चार-पाच दिवसांमध्ये विविध ठिकाणी आग लागण्याच्या घटना घडल्या. धारखंड येथे काजू बागायतीला आग लागून सुमारे पाच लाखांची नुकसानी झाली. केरी येथील संगणकाचे दुकान जळाल्‍याने दोन लाखांची हानी झाली. तर, वाघुरे व पिसुर्ले येथील खाण परिसरात आग लागून वन्‍यसंपत्तीचे नुकसान झाले आहे.

धारखंड येथील अंकुश कुडशेकर यांच्या काजू बागायतीला दोन दिवसांपूर्वी अचानक आग लागली. त्‍यांनी स्थानिकांना सोबत घेऊन आग विझवण्याचा प्रयत्न केला. तसेच वाळपई अग्निशामक दलाच्या यंत्रणेला पाचारण करण्यात आले.

दलाने तात्काळ धाव घेऊन आगीवर नियंत्रण मिळविले. पण तोपर्यंत सुमारे 5 लाख रुपयांचे नुकसान झालेच. दलाने सुमारे 10 लाख रुपयांची मालमत्ता वाचविली.

दुसऱ्या घटनेत केरी-सत्तरी येथील देवेंद्र गावस यांच्या कंप्‍युटर यंत्रणेला अचानक आग लागून सुमारे दोन लाख रुपयांचे नुकसान झाले. ही घटना सोमवारी पहाटे घडली.

आग लागल्‍याचे समजताच नागरिकांनी ती विझविण्‍यासाठी प्रयत्‍न केले. तरीसुद्धा यंत्रणेमधील कंप्‍युटर, झेरॉक्स मशीन, प्रिंटर, लॅपटॉप जळाले. त्‍यामुळे गावस कुटुंबाला मोठा आर्थिक फटका बसला आहे.

तिसऱ्या घटनेत वाघुरे येथे खाण परिसरातील काजू बागायती व जंगल संपत्तीला आग लागली. वन खात्याच्या कर्मचाऱ्यांनी धाव घेऊन आगीवर नियंत्रण मिळविले. मात्र काही झाडे आगीच्या भक्षस्थानी पडलीच. यामुळे मोठ्या प्रमाणात नुकसान झाले.

दरम्‍यान, सत्तरी तालुक्‍यातील माळरानावर, जंगलात आग लागण्‍याच्‍या घटना पुन्‍हा घडू लागल्‍याने नागरिकांमध्‍ये चिंता व्‍यक्त करण्‍यात येत आहे.