Margao Railway Station:

मडगाव येथील रेल्वेस्थानक परिसरातील प्लॅटफॉर्म क्रमांक सहावर चार अज्ञात युवकांकडून मारहाण करत मिथुन राज के. के. यांना लुटण्याचा प्रकार घडला. तसेच त्‍यांना एटीएममधून पैसे काढायलाही भाग पाडले.

तक्रारीनंतर कोकण रेल्वे पोलिसांनी अज्ञातांविरोधात गुन्हा नोंद करून तपास सुरू केला आहे. मडगाव रेल्वेस्थानक परिसरात परराज्यांतून आलेले अनेक लोक वस्ती करतात.

याचा त्रास आता प्रवाशांना होऊ लागला आहे. प्लॅटफॉर्मवर कुणीही नसल्याचे पाहून रात्रीच्या वेळी लुटमारीचे प्रकार घडत आहेत. वरील घटना २५ मे २०२३ रोजी रात्री अकराच्या सुमारास घडली होती.

मात्र या प्रकरणात आता गुन्‍हा नोंद करण्‍यात आला आहे. या प्रकारानंतर मिथुन याने पोलिसांत तक्रार नोंद केली.

त्‍यास अनुसरून कोकण रेल्वे पोलिसांनी चार अज्ञातांविरोधात गुन्हा नोंद केला आहे. या प्रकरणी पोलिस निरीक्षक सुनील गुडलर यांच्यासह कोकण रेल्वे पोलिस तपास करत आहेत.

बुक्क्यांनी मारहाण करून माजवली दहशत

तक्रारदार मिथुन राज के. के. (३३, रा. केरळ) हा युवक मडगाव रेल्वेस्थानकावरून स्वामी विवेकानंद रेल्वे हॉलिडे होमकडे जात होता. प्लॅटफॉर्म क्रमांक ६ वर कुणीच नसल्याची संधी साधून २० ते ३० वर्षे वयोगटांतील चार युवकांनी अडविले व पैशांची मागणी केली.

ते देण्यास नकार दिल्याने बुक्क्यांनी मारहाण करत त्‍याच्‍या पाकिटातील १ हजार रुपये व रेल्वे इमर्जन्‍सी पास जबरदस्तीने काढून घेतला. त्यानंतर मिथुनला एटीएमकडे नेत ५ हजार रुपये काढायला लावले. हे सर्व पैसे घेऊन त्‍यांनी पलायन केले.