PM Kisan Samman Nidhi Latest News: जे शेतकरी आयकर भरतात त्यांना प्रधानमंत्री किसान सन्मान योजनेचा फायदा घेता नाही असे नमूद करून 2018 साली या योजनेखाली केंद्रीय योजनेतून दिले गेलेले 6 हजार रुपये परत करा अशा आशयाची पत्रे कृषी खात्याकडून येऊ लागल्याने शेतकऱ्यांनी संताप व्यक्त केला आहे. गोव्यातील किमान 3 हजार शेतकऱ्यांना अशी पत्रे आली आहेत.

बाणावली मतदारसंघातील शेतकऱ्यांनी यासंबंधी आज आमदार वेंझी व्हिएगस यांची भेट घेऊन त्यांच्या समोर हा प्रश्न मांडला.या योजनेच्या निकषात काही शेतकरी पात्र होत नसल्याचे सांगत शेतकऱ्यांना दिलेली आर्थिक मदत परत जमा करण्यास सांगितले असल्याचे त्यानी सांगितले. बाणावली मतदारसंघातील 41 शेतकऱ्यांना अशी पत्रे आली आहेत.

या संबंधी बोलताना आमदार व्हिएगस म्हणाले की, निवडणुकीच्या काळात भाजपने शेतकऱ्यांसाठी योजना जाहीर करून आणि काही वर्षांनंतर पैसे परत मागणे ही बाब धक्कादायक आहे, जर ते योजनेसाठी पात्र नव्हते तर त्यांना मुळात पैसे का दिले गेले असा सवाल केला. हा प्रश्न मी मुख्यमंत्र्यांकडे घेऊन जाणार आणि हे परिपत्रक मागे घेण्यास सरकारला निवेदन देणार आहे. गरज पडल्यास या प्रकरणी न्यायालयात लढाही देऊ असे त्यांनी सांगितले.

सुरावली येथील शेतकरी सवियो वालीस यावेळी बोलताना म्हणाले की ही योजना म्हणजे भाजपच्या केंद्र सरकारचा संपूर्ण निवडणूक जुमला आहे. बाणावलीचे एक शेतकरी सावियो कास्टेलो यांनी सांगितले की, मला पैसे परत करण्याचे पत्र मिळाले, परंतु या वर्षापर्यंत मला केंद्र सरकारकडून कधीही पैसेच मिळाले नाहीत.

हे परिपत्रक मागे घेण्यासाठी आम्ही सरकारला निवेदन देणार आहोत. यावर जोपर्यंत अंतीम निर्णय होत नाही तोपर्यंत शेतकऱ्यांनी हे पैसे परत करू नयेत असे आवाहन आमदार व्हिएगस यांनी यावेळी केले.