Vijai Sardesai : गोवा सरकारच्या वतीने गुजरात मध्ये सुप्रशासन व्यवस्थेचा अभ्यास करण्यासाठी अभ्यास दौरा आयोजित केला आहे. काही दिवसांपूर्वी सरदेसाईंनी या अभ्यास दौऱ्यावर टिका केली होती. म्हादई आणि कोळसा प्रश्नी सरकारने लक्ष देवून ही समस्या सोडवावी. जनतेचा पैशावर काढलेल्या मौजमजेच्या ट्रिपमध्ये मला रस नाही असे सरदेसाई यांनी सांगितले होते.

काल राज्यात शिवजयंती मोठ्या उत्साहात साजरी करण्यात आली. सरदेसाईंनी छत्रपती शिवाजी महाराजांच्या पुतळ्यास हार अर्पण केला. यावेळी त्यांनी पत्रकारांशी बोलताना अभ्यास दौऱ्यावरुन पुन्हा सावंत सरकारवर टोला लगावला.

"सुशासन शिकण्यासाठी गुजरातला जाण्याची गरज नाही. आपल्या राज्यातील मंत्री सुशासन शिकण्यासाठी गुजरातला जाणार आहेत. जर तुम्हाला खरंच शिकायचं सुशासन शिकायचं असेल तर छत्रपती शिवाजी महाराजांकडून शिका."

"महाराज हे सुशासनाचे प्रतिक आहेत. मुख्यमंत्री डॉ. सावंतांनी गुजरातला न जाता त्यांच्याकडूनच शिकावे" असा टोला फातोर्ड्याचे आमदार तथा गोवा फॉरवर्डचे अध्‍यक्ष विजय सरदेसाई यांनी मुख्यमंत्र्यांना लगावला आहे.

सरदेसाई म्हणाले, छत्रपती शिवाजी महाराजांच्या अनेक लढायांमध्ये त्यांनी केलेल्या पराक्रमाचा गौरव आपण करत असताना, न्याय्य, सक्षम, पुरोगामी, लोकाभिमुख, नागरी शासन प्रस्थापित करण्याच्या त्यांच्या प्रशासकीय प्रतिभांकडे आपण दुर्लक्ष करतो. सुशासन शिकण्यासाठी गुजरातला जाण्याची काय गरज शिवाजी महाराजांचे अनुकरण करा असे सरदेसाई म्हणाले.