मडगाव: गोव्यातील प्रशासनात भ्रष्टाचार वाढल्याच्या पार्श्वभूमीवर गोव्यातही पंजाबच्या धर्तीवर भ्रष्टाचाऱ्या विरोधात तक्रार करण्यासाठी ‘भ्रष्टाचारविरोधी हेल्पलाईन’ सुरू करा अशी मागणी अखिल गोवा उद्योजक संघटनेने मुख्यमंत्री डॉ. प्रमोद सावंत यांच्याकडे केली आहे.

डॉ. सावंत यांची दुसऱ्यांदा मुख्यमंत्रिपदी निवड झाल्यामुळे या संघटनेचे अध्यक्ष दामोदर कोचकर यांनी त्यांचे अभिनंदन करताना त्यांनी जे भ्रष्टाचारमुक्त प्रशासन देण्याचे आश्वासन दिले आहे त्याचे स्वागत केले आहे.

यासंदर्भात प्रसिद्धीस दिलेल्या पत्रकात कोचकर यांनी, मुख्यमंत्री प्रमोद सावंत (Pramod Sawant) यांनी खातेवाटप करताना जे कोण यापूर्वी आपली खाती सांभाळण्यास अकार्यक्षम असल्‍याचे दिसून आले आहेत, त्यांच्यावर ही जबाबदारी सोपवू नये आणि ज्यांना आपल्या खात्यातील कामाची माहिती आहे अशांनाच त्या खात्याचे मंत्री करावेत अशी मागणी केली आहे.

प्रत्येक खात्यात तक्रार केंद्र स्थापन करून जर कुणी भ्रष्टाचार (Corruption) किंवा वेळकाढूपणा केल्यास त्यांच्याविरूद्ध तक्रार करण्याची सोय उपलब्ध करून द्यावी. तसेच या तक्रारीत तथ्य आढळल्यास संबंधितावर कडक कारवाई करावी असे कोचकर यांनी म्हटले आहे.