पणजी: सक्तवसुली संचालनालयाने (ईडी) गेल्या एप्रिलमध्ये रोहन हरमलकर याच्या गोव्यातील निवासस्थानी व कार्यालयांवर छापे टाकून सुमारे १६०० कोटींच्या जमिनींच्या मालमत्ता व्यवहारांचे दस्तावेज जप्त केले होते. तेव्हापासून जमीन हडप व्यवहारातील मास्टरमाईंड रोहन हरमलकर याच्या शोधात ईडी होती. बुधवारी (०४ जून) अखेर त्याच्या मुसक्या आवळण्यात ईडीला यश आले.

म्हापसा न्यायालयाने त्याला १४ दिवसांची ईडी कोठडी दिली आहे. गोव्यामध्ये रोहन हरमलकर याने मोठ्या प्रमाणात जमीन व्यवहार केल्याची माहिती ईडी मिळाल्यावर त्याच्या मालमत्तेसंदर्भात गुप्तपणे चौकशी सुरू होती. २४ व २५ एप्रिल २०२५ रोजी ईडीने हरमलकर याच्या पिळर्ण, पर्वरी, दिवाडी व इतर ठिकाणच्या निवासस्थानी तसेच कार्यालयावर छापे टाकले होते.

या छाप्यावेळी ईडीने सुमारे १ हजार कोटींपेक्षा अधिक बाजारमूल्य असलेली हणजूण, हडफडे, आसगाव व इतर ठिकाणच्या जमिनींची तसेच ६०० कोटींपेक्षा अधिक किंमतीच्या स्थावर मालमत्तांचा दस्तावेज जप्त केला होता. याव्यतिरिक्त त्याच्या पिळर्ण येथील घराला सीलही ठोकले होते.