Sangem : सांगेचे भाजपा आमदार सुभाष फळदेसाई आणि दक्षिण गोवा भाजपा एसटी मोर्चा अध्यक्ष ॲड. आनंद गावकर यांच्यात कलगीतुरा निर्माण झाला आहे. आपण बोललेल्या वक्तव्याचा चुकीचा अर्थ काढून आपल्यावर नाहक आरोप करण्यात आले असून आपण एक मीटरसुद्धा जमीन विक्री केल्याचा पुरावा सादर करावा न पेक्षा राजीनामा द्यावा, असे आवाहन ॲड. गावकर यांनी फळदेसाई यांना दिले आहे.

सांगे येथे घेतलेल्या पत्रकार परिषदेत ते बोलत होते. आपण आपल्याच गावातील लोकांच्या जमिनी आणि गावचे मंदिरसुद्धा राखीव वनक्षेत्रात समाविष्ट होत असल्यामुळे लोकांच्या जमिनी आणि मंदिर सुरक्षित रहावे म्हणून जिल्हा पंचायत सदस्य सुरेश केपेकर यांच्या माध्यमातून या विषयात लक्ष घालण्याची यापूर्वी सूचना केली होती. त्यात दुर्लक्ष केल्यामुळे आपण प्रसार माध्यमाशी बोलताना गावातील लोकांच्या भावना व्यक्त केल्या होत्या, असेही ते म्हणाले.

आपण कधीच जमिनी विकण्याचा व्यवसाय केला नाही. जर एक मीटरसुद्धा जमिनीची विक्री केली असल्यास तसे आमदारांनी सहा महिन्यांत सिद्ध करावे, नसल्यास राजीनामा द्यावा, अशी मागणी त्यांनी केली. यापूर्वीसुद्धा सांगेत इको सेन्सेटिव्ह झोन संदर्भात आम्ही आवाज उठवला होता. त्यावेळी कोणी किती समर्थन दिले होते ते सर्वश्रुत आहे, असेही ते म्हणाले.

‘गावातील लोकांसाठीच पुढाकार’

आपली जमीन राखीव वनक्षेत्रात येत नाही. केवळ गावातील लोकांच्या हितासाठी आपण पुढाकार घेतला होता. त्याचा वेगळा अर्थ काढून माझ्याविरुद्ध बिनबुडाचे आरोप केले जात आहेत. असे आनंद गावकर यांनी सांगितले.