Arrested Accused From karnataka in mobile Theft : मुका असल्याचे भासवून लोकांच्या घरी भिक मागणाऱ्या एकाला कोकण रेल्वे पोलिसांनी ताब्यात घेतले आहे. त्याच्याकडे तब्बल 2 लाख रुपये किंमतीचे 11 मोबाईल फोन सापडले आहेत. तसेच हा चोरटा मुका नसून त्याला बोलता येत असल्याचे तपासात उघड झाले आहे.

याबाबत कोकण रेल्वेचे पोलीस निरीक्षक सुनील गुडलर यांनी दिलेल्या माहितीनुसार, मडगाव रेल्वे स्थानकावर संशयित संशयास्पद स्थितीत फिरत असताना रेल्वे पोलिसांनी त्याला हटकले. यावेळी संशयिताने पळून जाण्याचा प्रयत्न केला.

कोकण रेल्वे पोलिस संशयिताचा पाठलाग करीत असताना संशयित धडपडीत जमिनीवर कोसळला. आरपीएफच्या रिंकू यादव आणि एस. राठोड या जवानांनी त्याला जेरबंद केले. यावेळी त्याची झडती घेतली असता त्याच्याकडे 11 महागडे मोबाईल सापडले.

संशयित चोरट्याची चौकशी केली असता नाव गोपी असे असून तो मूळ शिमोगा येथील चोरट्यांच्या टोळीचा सदस्य असल्याची माहिती मिळाली. तसेच चोरट्याकडे पोलिसाना 'तो मुका असून त्याला मदत करा' असे लोकांना आवाहन करणारे पत्रही सापडले.

सुरवातीला चौकशी दरम्यान तो मुका असल्याचे नाटक करु लागला मात्र, पोलिसांनी खाकीचा हिसका दाखवताच तो बोलू लागला. शिमोगा टोळीतील अन्य सदस्य गोव्यात सक्रीय आहेत का याचा शोध पोलीस घेत असल्याची माहिती पोलीस निरीक्षक सुनील गुडलर यांनी दिली.

मुका असल्याचे भासवून लोकांच्या घरी भिक मागताना लोकांची नजर चुकवून ते त्यांचे मोबाईल व इतर वस्तू लंपास करीत असत.