दोडामार्ग: सहा हत्तींच्या कळपाचा वावर केर गावातील तळीच्या वरच्या बाजूला आहे, तर ‘बाहुबली’सुद्धा केरमध्ये दाखल झाला असून घाडवस मंदिराजवळ येऊन पोहोचला आहे. ‘बाहुबली’ हत्ती कळपाला येऊन मिळाला, तर ‘गणेश’ व ‘बाहुबली’ यांच्यात युद्ध जुंपण्याची तीव्र शक्यता वर्तविण्यात येत आहे. यासाठी वनविभागाने हत्तींच्या मार्गावर ठिकठिकाणी गस्त वाढविली असून हत्तींच्या कळपाला रानातच थोपवून धरण्यासाठी प्रयत्न चालू आहेत.

घोटगे गावात ठाण मांडून असलेल्या हत्तींच्या कळपाने आता आपला मोर्चा केर गावाच्या दिशेने वळविला आहे. वनविभागाला मिळालेल्या लोकेशननुसार केर गावात सहा हत्तींचा कळप पोहोचला आहे. त्यांचा वावर गावातील तळीच्या वरच्या बाजूस खासगी वनक्षेत्रात आहे. गणेश, ओंकार, छोटी मादी, मोठी मादी व दोन पिल्ले (एकूण ६) यांचा यात समावेश आहे.

घाटमाथ्यावर स्थिरावलेल्या बाहुबली टस्कराने चार दिवसांपूर्वी पुन्हा तिलारी कार्यक्षेत्रात हजेरी लावली. हा बाहुबलीही केर गावात दाखल झाला आहे. कळपापासून काही अंतरावर तो आहे. या कळपाचे नेतृत्व याआधी बाहुबलीकडे होते. त्यावेळी गणेश टस्कर छोटा व अल्प ताकदीचा होता; मात्र कालांतराने त्याच्यात शारीरिक बदल झाले. त्यानंतर कळपाच्या नेतृत्वासाठी तो दावेदार बनला.

यातूनच गेल्या वर्षी बाहुबली आणि गणेश हत्ती यांच्यात युद्ध जुंपले होते. या युद्धात गणेशचे बळ बाहुबलीवर भारी पडले. गणेशने बाहुबलीला पळवून लावले आणि कळपाचा ताबा आपल्याकडे घेतला. हा दोघांमधील संघर्षाचा प्रकार अद्यापही कोणी विसरलेला नाही. आता पुन्हा बाहुबलीचे आगमन झाले आहे. बाहुबली कळपापासून काही अंतरावरच आहे.

कळपाची आणि बाहुबलीची भेट झाली तर, गणेश आणि बाहुबली यांच्यात युद्ध जुंपणार, हे निश्चित असल्याचे प्राणी अभ्यासक सांगतात. याचे परिणाम काय उद्भवतील हे सांगता येणार नाही. कारण या दोघांत जर युद्ध जुंपले तर त्या भीतीने कळपातील अन्य मादी, पिल्ले यांच्यावर परिणाम होऊ शकतो.

नेतृत्वाची झुंज

गतवर्षी जूनच्या सुरुवातीला बाहुबली व गणेश यांच्यात बांबर्डे येथे झुंज जुंपली होती; मात्र, या झुंजीत बाहुबलीवर गणेश भारी पडताच बाहुबलीने काढता पाय घेत पलायन केले होते. तेव्हापासून या कळपाचे नेतृत्व गणेश हत्ती करीत आहे. वर्षभराच्या कालावधीनंतर परतलेला बाहुबली कळपाच्या नेतृत्वाची जबाबदारी पुन्हा आपल्याकडे घेईल, की गणेशसमोर जाण्याचे टाळेल? याकडे लक्ष लागून राहिले आहे.