Karnataka Minister Santosh Lad Meets Goa CM Pramod Sawant

पणजी: "कर्नाटकातील कामगार आणि स्थालांतरितांना पोलिसांपासून संरक्षण द्या. तसेच, त्यांना आरोग्य, रेशन यासारख्या सुविधा मिळाव्यात", अशी मागणी कर्नाटकचे कामगार कल्याण मंत्री संतोष लाड यांनी गोव्याचे मुख्यमंत्री डॉ. प्रमोद सांवत यांच्याकडे केली आहे. लाड यांनी याबाबतचे निवेदन मुख्यमंत्री सावंत यांना पणजीत रविवारी (१६ फेब्रुवारी) भेट घेऊन दिले.

कर्नाटकमधून गोव्यात रोजगारासाठी आलेल्या स्थलांतरीत कामगारांना राज्यात विविध त्रास सहन करावा लागत आहे. त्यांचा पोलिस आणि स्थानिक संस्थांकडून छळ सुरु असल्याचे निदर्शनास आले आहे. सामाजिक सुरक्षा साधनांपासून त्यांना वंचित राहावे लागत आहे. तसेच, सरकारच्या विविध कल्याणकारी योजनांचा लाभ त्यांना मिळत नसल्याचे आढळून आले आहे, असे लाड यांनी मुख्यमंत्री सावंत यांना दिलेल्या निवेदनात म्हटले आहे.

कर्नाटकातील कामगारांना सबसिडीचे रेशन आरोग्य सुविधा आणि विविध योजनांचा लाभ मिळावा, अशी विनंती वजा मागणी लाड यांनी निवेदनातून मुख्यमंत्र्यांकडे केली. कर्नाटकातील कामागारांचे पोलिस आणि इतर शासकीय यंत्रणांपासून होणारी छळवणूक थांबवावी, अशीही मागणी निवेदनातून केली आहे.

गोवा आणि कर्नाटकमध्ये विशेष बंध आहेत. दोन्ही राज्य त्यांच्या आधारातिथ्यासाठी ओळखले जातात. गोव्याच्या प्रगती आणि विकासासाठी योगदान देणाऱ्या कर्नाटकातील कामगारांना संरक्षण द्यावी, अशी मागणी मंत्री लाड यांनी मुख्यमंत्री सावंत यांच्याकडे केली आहे.