South Goa Liquor Ban: कर्नाटक विधानसभा निवडणुकीच्या पार्श्वभूमीवर अवैध प्रकार टाळण्यासाठी सध्या प्रशासन सतर्क झाले आहे. त्यासाठी कर्नाटकसह गोव्यात देखील काळजी घेतली जात आहे.

शिवाय गोव्यातून कर्नाटकमध्ये अवैध दारू वाहतूक होऊ नये यासाठी सर्व तपासणी नाके सध्या कसून चौकशी करत आहेत.

दरम्यान, दक्षिण गोव्यात देखील काही भागात कर्नाटक निवडणुकीच्या पार्श्वभूमीवर मद्य विक्रीस बंदी घातली आहे.

(Ban on Sale of Liquor in the South Goa District within 5kms from the Karnataka Border)

दक्षिण गोवा जिल्हाधिकारी आश्विन चंद्रू यांनी याबाबत आदेश काढले आहेत. आदेशानुसार, कर्नाटक राज्याला लागून असलेल्या पाच किमीच्या गोव्यातील हद्दीत मद्य विक्रीला बंदी असेल. 08 मे सायंकाळी 05 वाजता लागू होणारी ही बंदी 10 मे सायंकाळी सहा वाजेपर्यंत असेल असे आदेशात म्हटले आहे.

तसेच, 13 मे रोजी सकाळी सहा ते 14 मे सकाळी सहा वाजेपर्यंत कर्नाटक सीमेला लागून असलेल्या पाच किमी हद्दीत मद्य विक्रीस बंदी असणार आहे. असे आदेशात म्हटले आहे.

मद्य विक्रीस बंदी करण्याबाबत जिल्हा निवडणूक अधिकाऱ्यांनी विनंती करण्याबाबत पत्र लिहले होते.

त्यानंतर याबाबत निर्णय घेण्यात आला आहे. आदेशानुसार वरील काळात संबधित भागातील मद्य दुकाने, बार यांनी नियमाचे उल्लंघन केल्यास त्यांचा मद्य विक्री परवाना रद्द केला जाऊ शकतो.

तसेच, याकाळात बार आणि रेस्टॉरंट अशी दुय्यम सेवा देणाऱ्या दुकानांना या काळात केवळ जेवण देता येईल. असे आदेशात म्हटले आहे.