डिचोली: कारापूर येथे सुमारे ५५ वर्षीय अविवाहित महिलेचा संशयास्पद मृत्यू झाला असून विजेचा ‘शॉक’ लागून तिचा मृत्यू झाल्याचा प्राथमिक अंदाज आहे. मात्र, हा अपघात नसून घातपाताचा प्रकार असल्याचा संशय ‘गाकुवेध’ महासंघासह मृत महिलेच्या नातलगांनी व्यक्त केला आहे. वासंती रामा सालेलकर असे मृत महिलेचे नाव असून त्या अनुसूचित जमात समाजातील होत्या.

न्यायप्रविष्ठ भाटातील ज्या घरात त्या राहत होत्या, त्या घरात आज सकाळी त्या मृतावस्थेत आढळून आल्या. याप्रकरणी डिचोली पोलिसांनी पंचनामा करून वासंती हिचा मृतदेह ताब्यात घेवून तो वैद्यकीय तपासणीसाठी बांबोळी येथे ‘गोमेकॉ’त पाठविला आहे. वैद्यकीय तपासणीनंतरच मृत्यूचे नेमके कारण स्पष्ट होणार आहे.

दरम्यान, सायंकाळी श्वान पथकाला पाचारण करून तपास करण्याचा प्रयत्न केला असता, महत्त्वाचे संशयास्पद असे कोणतेच धागेदोरे मिळाले नाहीत. फॉरेन्सिक विभागानेही घटनास्थळी येऊन पाहणी केली आहे. याप्रकरणी पोलिस पुढील तपास करीत आहेत.

वासंती कारापूरमधील कोळशे कातर या नावाने ओळखण्यात येणाऱ्या भाटात असलेल्या घरात राहत होत्या. ज्या भाटात त्या राहत होत्या, त्या भाटाच्या मालमत्तेचा विषय गेल्या काही वर्षांपासून न्यायप्रविष्ठ आहे. मालमत्तेच्या वादातून यापूर्वी वासंती यांच्यावर दोन ते तीनवेळा हल्ले झाले होते, अशी माहिती वासंती यांच्या नातेवाईकांकडून मिळाली आहे.

बहीण नसताना घटना

वासंती या भाटातील घरात एकट्याच राहत होत्या. त्यांच्यावर पुन्हा हल्ला होईल या भीतीने पिळगाव येथील त्यांची बहीण त्यांच्यासोबत राहत होती. मात्र, कालोत्सवानिमित्त ती कालच पिळगाव येथे गेली होती. त्यामुळे रात्री वासंती घरात एकट्याच होत्या. सकाळी बहीण कारापूर येथे आली असता, वासंती घरात मृतावस्थेत आढळून आल्या. घरी एकट्याच असताना वासंती हिचा झालेला संशयास्पद मृत्यू हा घातपात असू शकतो. अशी शक्यता ओमप्रकाश कवळेकर यांच्यासह अन्य नातेवाईकांनी व्यक्त केला आहे.