Goa News: चोर्लाघाट माथ्यावरील कणकुंबी, चिगुळे व दोडामार्ग तालुक्यातील कोदाळी या तीन गावांच्या माऊली देवींचा 12 वर्षांनी होणारा ‘भेट’ सोहळा व जत्रोत्सव शुक्रवार, 10 ते बुधवार, 15 रोजी असे सहा दिवस साजरा होणार आहे. यातील सर्वात महत्त्वाचा श्री माऊली देवींचा भेट उत्सव रविवार, 12 रोजी होणार आहे.

दरम्यान, शनिवार, 11 रोजी कोदाळी येथील माऊली देवीच्या पालखीचे चिगुळे येथे आगमन होणार आहे. चिगुळे माऊली देवी आणि कोदाळ येथील माऊली यांची मिरवणूक झाल्यानंतर रात्री 12 वाजता श्री सातेरी केळबाई नाट्य मंडळ पारवाड यांच्यातर्फे संगीत ‘सावतामाळी’ हे विठ्ठल गावडे पारवाडकर लिखित नाटक सादर होणार आहे.

रविवार, 12 रोजी चिगुळे-कणकुंबी रस्त्यालगतच्या ‘धुळ्याच्या वरंड्याकडे’ या जागी कणकुंबी, चिगुळे व कोदाळी या तीन माऊली भगिनींची भेट सकाळी 9 वाजता होणार आहे. त्यानंतर तिन्ही माऊलींच्या पालख्या कणकुंबी गावी जातील.

तेथे विविध धार्मिक कार्यक्रम झाल्यानंतर रात्री कणकुंबी युवकांतर्फे श्री माऊली मंदिरासमोर ‘संगीत अमृत मोहिनी’ हे नाटक सादर होईल. या नाटकाचे निर्माते गोविंद गावडे तर दिग्दर्शक प्रभाकर पंडित आहेत.

सोमवार, 13 रोजी दिवसभर धार्मिक कार्यक्रम झाल्यानंतर रात्री सुर्ला-सत्तरीतर्फे ‘करीन ती पूर्व’ हे नाटक सादर होणार आहे. मंगळवार, 14 रोजी दिवसभर धार्मिक विधी झाल्यानंतर रात्री तळावडे युवकांतर्फे ‘शिवशाहीचा विजयी डंका’ हे नाटक सादर होणार आहे.

म्हातारी बाय मंदिराचे शुक्रवारी उद्‌घाटन

चोर्लाघाटावरील चिगुळे येथील म्हातारी बाय मंदिराचे उद्‌घाटन शुक्रवार, 10 रोजी होणार आहे. म्हातारी बायची मूर्ती प्रतिष्ठापना पारवडेश्वर मठाचे मठाधीश भाऊ महाराज यांच्या हस्ते होणार आहे. यानिमित्त पहाटेपासून विविध धार्मिक विधी होतील.

या सर्व कार्यक्रमांच्या अध्यक्षस्थानी प्रकाश चौगुले असणार आहेत. सायंकाळी पालखी मिरवणूक व रात्री चिगुळे युवकांतर्फे संगीत ‘धनुर्वेद’ हे नाटक सादर होणार आहे.