मडगाव: कामराळ-कुडचडे येथील साईनाथ पंचायतन देवस्थानात काही जणांनी मोठ्या प्रमाणावर आर्थिक घोटाळा केलेला असून यासंबंधी कुडचडे पोलिस स्थानकावर तक्रार देऊन कित्येक दिवस उलटले तरी यासंदर्भात अजून गुन्हा नोंद केलेला नाही, असे स्थानिकांतर्फे मंगळवारी (ता.१०) सांगण्यात आले.

आठ दिवसांत संबंधितांवर गुन्हा नोंद केला नाही तर पोलिस स्थानकासमोर उपोषणाला बसू, असा इशाराही स्थानिकांनी दिला.या देवस्थान समितीचे सरचिटणीस सुदेश नाईक यांच्यासमवेत मंगळवारी समिती सदस्य आणि काही स्थानिकांनी मडगाव येथे पत्रकार परिषद घेऊन हा इशारा दिला.

वेगळी संस्था स्थापन करून गैरव्यवहार

या देवस्थानच्या कार्यकारी समितीचे सदस्य विनोद नाईक यांनी याप्रकरणी देवस्थान समितीचे अध्यक्ष विजय पंचवाडकर यांच्याविरोधात तक्रार दिल्याचे सांगितले. या देवस्थानच्या ऐवजी वेगळी संस्था स्थापन करून देवस्थानाला आलेला सगळा पैसा या बँक खात्यात वळवून हा गैरव्यवहार केल्याचा आरोप यावेळी करण्यात आला.