पणजी: कला अकादमीत दुपारनंतर पाण्याची वाणवा जाणवली. शनिवारी सुटीमुळे बांदोडकर मैदानातील पुस्तक महोत्सवास आलेल्यांची गर्दी, दुपारी हेडगेवार प्राथमिक शाळेच्या स्नेहसंमेलनामुळे विद्यार्थी-पालकांची गर्दी यामुळे येथील शौचालयाचा वापर मोठ्या प्रमाणात झाला.

त्यामुळे सायंकाळी शौचालयात पाणीच नसल्याने गोंधळ सुरू झाला, येथील सुरक्षारक्षकांनी सार्वजनिक बांधकाम खात्यास टँकर पाठवण्याची सूचना दुपारी चार वाजता केली तरीही सायंकाळी आठ वाजेपर्यंत टँकर आला नसल्याचे दिसून आले.

बांदोडकर मैदानावर पुस्तक महोत्सवात येणारे लोक कला अकादमीतील शौचालयाचाच वापर करतात. दुपारपर्यंत पाणी होते, परंतु पाण्याचा वापर अधिक झाल्याने ते संपले. शौचालयात फ्लश होत नसल्याच्या तक्रारी अनेकांनी केल्या.

पाणी संपल्याने येथील सुरक्षारक्षकांनी तात्काळ संबंधित सार्वजनिक बांधकाम खात्यास याबाबत सूचित केले आणि टँकर पाठविण्याची विनंती केली, परंतु सायंकाळी चार वाजता केलेल्या विनंतीला साबांखाच्या कार्यालयाकडून अजिबात प्रतिसाद मिळाला नसल्याचे स्पष्ट झाले. सायंकाळी आठ वाजेपर्यंत तरी टँकर काही पोहोचला नसल्याचे आढळून आले.

विशेष बाब म्हणजे महोत्सवासाठी राज्यभरातून लोक आले होते. दक्षिण गोव्यातील काही सुजाण नागरिकांनी याबाबत प्रसारमाध्यमांकडे तक्रारी केल्याने हा प्रकार उघडकीस आला. याबाबत विचारणा करण्यासाठी कला अकादमीचे चेअरमन बाबू कवळेकर यांच्याशी संपर्क साधण्यात आला, परंतु त्यांच्याकडून काही प्रतिसाद मिळाला नाही.