Kadamba Transport Corporation issued show cause notice to 16 employees: नेत्रावळी अभयारण्यातील साळजिणी येथे सहलीला गेलेल्या १६ कदंब कर्मचाऱ्यांविरोधात वन खात्याकडून कथित शिकारप्रकरणी गुन्हा दाखल केला आहे. तर, आता या प्रकरणी कदंब वाहतूक महामंडळाने या सर्वांना कारणे दाखवा नोटीस बजावली आहे. त्यास अनेकांनी उत्तर दिले आहे. महामंडळाचे व्यवस्थापकीय संचालक सध्‍या गोव्याबाहेर आहेत. ते परतल्यावर दोन दिवसांत योग्य निर्णय घेतला जाईल, अशी माहिती महामंडळाचे अध्यक्ष तथा आमदार उल्हास तुयेकर यांनी दिली.

वन खात्याने वनसंरक्षण कायद्याखाली या १६ कदंब कर्मचाऱ्यांविरोधात गुन्हा केल्यानंतर न्यायालयाने त्यांची जामिनावर सुटका केली होती. तर, महामंडळाने या सर्वांना कारणे दाखवा नोटीस बजावून कारवाई का केली जाऊ नये असे नमूद करून सात दिवसांत उत्तर देण्यास सांगितले होते. त्यानुसार काही कर्मचाऱ्यांनी या नोटिशीला उत्तर दिले आहे. सध्या हे कर्मचारी मडगाव डेपोमध्ये सेवेत आहेत. वन खात्याने या प्रकरणाची सखोल चौकशी सुरू केल्याने ते चांगलेच अडचणीत आले आहेत.

वनरक्षक, ड्रोनद्वारे अभयारण्‍यात निगराणी

वन खात्याने अभयारण्यातील क्षेत्रात शिकारीसाठी जाणाऱ्यांवर लक्ष ठेवण्‍यासाठी तसेच आगीच्या घटना टाळण्यासाठी काही वनरक्षकांची नियुक्ती केली आहे. शिवाय ड्रोनद्वारेही या क्षेत्रात निगराणी ठेवली जात आहे. सुमारे आठ ते दहा किलोमीटर अंतरापर्यंत ड्रोनद्वारे लक्ष ठेवण्यात येत आहे. अभयारण्यात येणाऱ्या लोकांची तसेच पर्यटकांची तपासणी वनरक्षकांकडून केली जात आहे.