पणजी: पणजीहून फोंड्याच्‍या दिशेने जाणाऱ्या कदंब पठार महामार्गावरील पथदीप गेल्या कित्येक दिवसांपासून बंदच आहेत. त्‍यामुळे या रस्त्यावरून येजा करणाऱ्या वाहनचालकांसाठी हा रस्‍ता धोकादायक बनला आहे. या रस्त्यावर रात्रीच्या वेळी गुरे ठाण मांडून बसत असल्याने भरधाव वेगाने येणाऱ्या वाहनांचा भीषण अपघात होण्याची शक्यता नाकारता येत नाही.

कदंब पठारावरील राष्ट्रीय महामार्ग हा सहापदरी झाल्यापासून तेथून वाहनांची वर्दळ मोठ्या प्रमाणात वाढली आहे. या महामार्गावर दुचाकी व चारचाकी वाहनांसाठी वेगवेगळ्या पदरी (लेन) आहेत. मात्र तरीही वाहनचालक त्याचे पालन न करता कोणत्याही लेनमधून वाहने हाकतात. या वाहनांची गती सुमारे 100 किलोमीटरपेक्षा अधिक असते.

त्‍यातच या रस्त्यावर काळोख असल्याने तेथे असलेली गुरे दिसत नाही. यापूर्वी अनेकदा रस्त्यावर बसलेल्या गुरांना ठोकर दिल्याने अपघाताच्या घटना घडल्या आहेत. चारचाकी वाहनांपेक्षा दुचाकीचालकांना त्याचा धोका अधिक आहे. काहींना मृत्यूलाही सामोरे जाण्याची वेळ आलेली आहे.

या महामार्गावर पथदीप आहेत, मात्र अनेकदा ते बंदच असतात. एखादी महनीय व्यक्ती तेथून जाणार असली तरच पथदीपांची दुरुस्ती केली जाते, अन्‍यथा ते एकदा बंद पडले की त्याकडे वीज खाते तसेच संबंधित पंचायतही लक्ष देत नाही. यामुळे हा महामार्ग फक्त अतिमहनीय व्यक्तींसाठी आहे का, असा प्रश्‍न वाहनचालक उपस्‍थित करीत आहेत. महामार्ग रुंद तसेच खड्डेमुक्त असल्याने वाहनांची गती बेफाम असते. तसेच समोरून येणाऱ्या वाहनांचे दिवे प्रखर असल्याने पुढचे काहीच दिसत नाही. त्‍यामुळे वाहनचालकांना विशेषत: दुचाकीस्‍वारांना मात्र जीव मुठीत धरून वाहन चालवावे लागते.