मडगाव : सातव्या वेतन आयोगाच्या पगार श्रेणी मिळाल्यानंतर ३४ महिन्यांची जी थकबाकी अडवून ठेवली आहे, ती कदंब महामंडळाच्या कर्मचाऱ्यांना मिळावी, यासाठी महामंडळाचे कर्मचारी २३ ते २७ मार्च या कालावधीत पणजी येथील आझाद मैदानावर पाच दिवसांचे धरणे आंदोलन करणार आहेत.

या निषेध आंदोलनाच्या तयारीचा आढावा घेण्यासाठी युनियनचे अध्यक्ष चंद्रकांत चोडणकर यांच्या अध्यक्षतेखाली शुक्रवारी मडगाव डेपोवर बैठक झाली.

हे पाच दिवसांचे निषेध आंदोलन करण्यात येणार असले तरी नियमित बस सेवेवर त्याचा परिणाम होणार नाही, याची काळजी आम्ही घेऊ, असे चोडणकर यांनी सांगितले. महामंडळाचे कर्मचारी आळीपाळीने या आंदोलनात भाग घेणार आहेत, असेही त्यांनी स्पष्ट केले.

कदंब महामंडळात आठ वर्षांपेक्षा जास्त काळ अस्थायी स्वरूपात कामाला असलेल्या कर्मचाऱ्यांना सेवेत कायम करावे, अशी मागणीही यावेळी करण्यात आली.