Kadamba Bus Services : कर्नाटक विधानसभा निवडणुकीच्‍या पार्श्वभूमीवर पंतप्रधानांच्‍या सभेवेळी गोव्‍यातून ७० कदंब बसेस कर्नाटकात पाठवण्‍यात आल्‍याचा आरोप विरोधकांनी केला होता. त्‍या अनुषंगाने माहिती अधिकाराखाली कदंबने उत्तरादाखल ‘मोदींच्‍या रॅलीसाठी बसेस पाठवल्‍या नाहीत’, असे स्‍पष्‍टीकरण दिले आहे. तथापि, मे महिन्‍यात एका अनौपचारिक कराराद्वारे कदंबने कर्नाटकात पाठवलेल्‍या बसेससाठी 25 लाख 50 हजारांचे भाडे मिळाल्‍याचे कबूल केले आहे.

कर्नाटकात मोदींच्या सभेला गोव्‍यातून बसेस जात असल्‍याचा व्‍हिडिओ समाजमाध्‍यमांतून प्रसारित झाला होता. नियमित मार्गांवर अडचण करून बसेच अन्‍यत्र पाठविण्‍यात आल्‍या आणि त्‍यामुळे प्रवाशांना त्रास सहन करावा लागल्‍याचा आरोप करण्‍यात आला होता. ‘गोवा फर्स्ट’ या बिगरसरकारी संघटनेचे अध्यक्ष परशुराम सोनुर्लेकर यांनी 4 मे रोजी उत्तर कर्नाटकातील पंतप्रधान नरेंद्र मोदी यांच्या रॅलीसाठी कदंब बसेस तैनातीबद्दल माहिती हक्क कायद्याअंतर्गत प्रश्‍‍न विचारले होते.

औपचारिक कराराचा अन्‍वयार्थ

औपचारिक कराराद्वारे कदंबने कधी आणि किती बसेस कर्नाटकात गेल्‍या ही माहिती टाळली आहे. प्रासंगिक कराराच्‍या अनुषंगाने खासगी व्‍यक्‍तीकडून मोदींच्‍या सभेलाच या बसेस गेल्‍या असाव्‍यात, ही शक्‍यता नाकारता येत नाही. कारण कोणतेही असो; नियमित बसेस अन्‍यत्र वळवल्‍याने प्रवाशांचे हाल झाले होते, हे नाकारता येणार नाही.