शिवोली : समाजात चांगल्या तसेच वाईट अशा दोन्हीं प्रवृत्ती कार्यरत असतात. परंतु आपल्याला सतर्क राहून वाईटाचा सामना करायचा आहे, त्यासाठी पोलिस प्रशासन बांधील आहेच परंतु सतर्क जनतेनेही याकामात पोलिसांना सहकार्य करावे, असे आवाहन म्हापशाचे नवनियुक्त पोलिस उपअधीक्षक जीवबा दळवी यांनी हणजूण येथे केले. (Anjuna Crime News)

पोलिस आणि जनता यांच्यात सुसंवाद घडवून आणण्यासाठी हणजुण पोलिस स्थानकात ‘समाधान’ कार्यक्रम शनिवारी पार पडला. यावेळी हणजुणचे पोलिस निरीक्षक प्रशल देसाई व्यासपीठावर उपस्थित होते.

शिवोली पंचक्रोशीतील एकूण सहाही पंचायत क्षेत्रातील रहिवाशांनी बैठकीत उपस्थित राहून जीवबा दळवी यांच्याशी पंचक्रोशीला भेडसावणाऱ्या समस्यांबाबत सविस्तर चर्चा केली.

किनारी भागात ड्रग्ज व्यवहार होत असल्याबद्दल ग्रामस्थांनी विचारणा केली. त्यावर दळवी यांनी गुन्हेगारीचा नायनाट करण्यासाठी जनतेने सहकार्य करावे,असे आवाहन केले.

भाडेकरूंच्या पोलिस पडताळणीसाठी घरमालकांनी पोलिसांना मदत करावी,असे आवाहन दळवी यांनी केले.