सासष्टी: बाणावलीच्या लोकांच्या समस्या समजून घेण्यासाठी आपण संपूर्ण मतदारसंघात जनता दरबारांचे आयोजन करणार आहे,असे बाणावलीचे आप पक्षाचे आमदार वेन्झी व्हिएगस यांनी सांगितले. निवडून आल्याबद्दल त्यांच्या समर्थक कार्यकर्त्यांनी रॅलीचे आयोजन केले होते.विधानसभेत आप पक्ष हा लोकांचा आवाज म्हणून काम करणार असल्याचेही व्हिएगस यांनी सांगितले.

आपल्या पाच वर्षांच्या आमदारकीच्या काळात युवकांच्या समस्या सोडविण्याचा प्रयत्न केला जाईल. व त्यांच्या समस्यांना वाचा फोडली जाईल, असेही व्हिएगस यांनी सांगितले. त्याच्या समवेत आप पक्षाचे जिल्हा पंचायत सदस्य हेन्झेल फर्नांडिस उपस्थित होते. सर्वप्रथम बाणावली मतदार संघातील दहावी व बारावीच्या विद्यार्थ्यांसाठी प्रशिक्षण वर्ग भरवले जातील. हे विद्यार्थी आता अंतिम परीक्षा देणार आहेत. त्यामुळे या वर्गांचा त्यांना फायदाच होईल, असेही आमदार व्हिएगस यांनी सांगितले.

पावसाळ्या पूर्वीची सर्व दुरुस्तीची कामे लवकरच हातात घेतली जातील. लोकांच्या आरोग्याची काळजी घेण्यासाठी अनेक उपक्रम राबविले जातील, असेही आमदार वेन्झी व्हिएगस यांनी पत्रकारांना सांगितले.