महाजनकीच्या वादात अडकलेल्या मये येथील श्री माया केळबाई पंचायतन देवस्थानच्या धाकट्या अर्थातच माल्याच्या जत्रेतील ‘माले’ यंदाही पेटलेच नाही. माले पेटले नसल्याने समस्त भाविकांची निराशा तर झालीच, उलट पेटते ‘माले’ डोक्यावर घेऊन नाचण्याचा केळबाई देवीचा ‘पण’ही अपूर्ण राहिला.

बहीण असलेल्या मुळगावच्या देवीला निरोपही देता आला नाही. ‘माले’ पेटले नसले, तरी पारंपरिक रितीरिवाज केल्यानंतर मुळगाव येथील देवीची पेठेने (गुरुवारी) पहाटे मुळगावात प्रस्थान केले. परंपरेप्रमाणे मुळगावची पेठ तीन दिवस मये गावात होती.

सोमवारी (ता.27) मुळगाव येथील देवीची पेठ मये गावात आली होती. मात्र, यंदा केळबाई देवीची पेठ मंदिरातच बंदिस्त राहिली. जत्रेच्या दिवसापर्यंत तीन दिवस मंदिर बंदच होते. त्यामुळे जत्रेबाबत अनिश्चितता निर्माण झाली होती. त्यातच (बुधवारी) मये गावातील वाद चिघळल्याने मयेतील माल्याची जत्रा साजरी होण्याची शक्यताही मावळली होती. तरीदेखील काही भाविकांना चमत्काराची अपेक्षा होती.

मुळगावची पेठ गावात

परंपरेप्रमाणे काल मध्यरात्री मुळगाव येथील देवस्थानचे चौगुले आणि धोंड भक्तगण वाजतगाजत मयेत आले. मात्र, श्री माया केळबाई देवस्थानची तरंगे आणि माले चव्हाट्यावर आले नाही.

वायंगिणी येथील चौगुले आणि धोंड भक्तगण येताच, पारंपरिक रितीरिवाज करण्यात आले. नंतर पेठ बंद करून फुलांनी सजविण्यात आली. गाऱ्हाणे घातल्यानंतर पहाटे 4 वाजता अवसारी मोडासहित पेठेचे मुळगावच्या दिशेने प्रयाण झाले.

अजूनही मंदिर बंदच

श्री केळबाई देवीचे मंदिर अजूनही बंद आहे. गेल्या सोमवारी पहाटेपासून या मंदिराचा मुख्य दरवाजा उघडण्यात आलेला नाही. (गुरुवारी) सायंकाळी उशिरापर्यंत मंदिर बंदच होते. मंदिर बंद असल्याने त्यातच सहाजणांना अटक केल्याने नाईक गावकर गटातील लोक नाराज आहेत. महिलांसह या गटातील लोकांनी मंदिरातच ठाण मांडले आहे.