बाहेर धो-धो पाऊस कोसळतोय; पण घरात पिण्यासाठी पाणी नाही, अशी विचित्र स्थिती प्रियोळ मतदारसंघातील गोठण-वेलिंग भागातील नागरिकांची झाली आहे. या भागात मागच्या काही दिवसांपासून अनियमित पाणीपुरवठा होत होता; पण आज (शनिवारी) दिवसभर नळाला पाणीच नसल्याने पावसाचे पाणी प्यायचे काय, असा सवाल येथील नागरिकांनी केला आहे.

गोठण-वेलिंग भागात अनियमित पाणीपुरवठ्याचा प्रश्‍न मागच्या काही दिवसांपासून येथील नागरिकांना सतावत आहे. दिवसातून काही वेळ पाणी येते आणि नंतर गायब होते, अशी येथील स्थिती आहे. दोन दिवसांपूर्वी नळाला पाणीच नसल्याने लोकांनी कसेबसे निभावून नेले. मात्र आज (शनिवारी) पुन्हा तोच प्रकार झाल्याने लोकांनी या पाणी टंचाईविरुद्ध तीव्र संताप व्यक्त केला आहे.

सकाळपासून नळाला पाणीच नसल्याने लोकांची धावपळ उडाली आहे. इतर कामासाठी सोडाच; पण पिण्यासाठी पाणी नसल्याने हे पाणी आणायचे कुठून, असा सवाल येथील नागरिकांनी केला आहे. बाहेर धो-धो पाऊस कोसळत असताना नळाला पाणीच नसल्याच्या प्रतिक्रिया येथील गृहिणींनी दिल्या.

ओहोळातून जलवाहिनी

या भागातील जलवाहिनी ओहोळातून नेल्यामुळे ती फुटली की दुरुस्तीसाठी मोठे प्रयत्न करावे लागतात आणि त्यामुळे नळाला पाणी येत नाही. सार्वजनिक बांधकाम खात्याच्या पाणीपुरवठा विभागाने याप्रकरणी त्वरित लक्ष घालून येथील लोकांना पिण्याचे पाणी मिळण्यासाठी हे दुरुस्तीकाम त्वरित पूर्ण करावे, अशी मागणी नागरिकांनी केली आहे.