IPL Final Bookies From Goa Arrested in Nagpur: आयपीएलच्या काळात विविध सामन्यांवर सट्टा लावल्याच्या घटना वारंवार समोर येतात. दरम्यान, चेन्नई सुपर किंग्ज आणि गुजरात टायटन्स यांच्यात झालेल्या अंतिम सामन्यावर देखील ऑनलाइन सट्टा लावल्याची घटना समोर आली आहे.

पोलिसांना मिळालेल्या माहितीच्या आधारे आयपीएल फायनलवर सट्टा लावणाऱ्या दोन बुकींना नागपूर पोलिसांनी विमानतळावर अटक केली. दोघेही गोव्यातून नागपुरात आले होते.

कुमार हरीकुमार सचदेव आणि हेमंत राजकुमार गुरशाग्यानी अशी अटक करण्यात आलेल्या बुकींची नावे आहेत.

चेन्नई सुपर किंग्ज आणि गुजरात टायटन्स यांच्यात झालेल्या आयपीएल सामन्यावर सट्टा लावणारे दोन्ही बुकी गोव्याहून नागपुरात येत होते. नागपूर पोलिसांना याची गुप्त माहिती मिळाली. पोलिसांनी विमानतळावर सापळा रचला, दोघेही विमानतळाबाहेर येताच पोलिसांनी त्यांना अटक केली.

दोन्ही बुकींना सोनेगाव पोलीस ठाण्यात आणण्यात आले. त्यांच्याकडून एक लॅपटॉप, तीन मोबाईल, रोख रक्कम आणि तीन लाखांचा मुद्देमाल जप्त करण्यात आला आहे. या दोघांची पोलिसांकडून अधिक चौकशी सुरू आहे.

आयपीएल क्रिकेट सामन्यादरम्यान बेकायदेशीर सट्टा आणि बेहिशेबी आर्थिक व्यवहार करून सरकारची फसवणूक केली आहे. त्यांच्याविरुद्ध महाराष्ट्रातील जुगाराशी संबंधित कायद्यांतर्गत कारवाई करण्यात आली आहे. या बुकींचा हा अवैध धंदा महाराष्ट्रासह राज्याबाहेर पसरला असल्याचा संशय पोलिसांना आहे. त्याबाबतही अधिक तपास केला जात आहे.

चेन्नई सुपर किंग्ज आणि गुजरात टायटन्स यांच्यात सुरू असलेल्या आयपीएलच्या अंतिम सामन्यावर सट्टा लावण्यात गोव्यातील दोन बुकी सहभागी असून ते गोव्याहून नागपुरात येत असल्याची गुप्त माहिती नागपूर पोलिसांना मिळाली होती. पोलिसांना मिळालेल्या माहितीच्या आधारे विमानतळावर पोहोचल्यानंतर पोलिसांनी सापळा रचून त्यांना अटक केली.