मडगाव : एसजीपीडीएत झालेल्या सोपो घोटाळ्याची व्याप्ती मोठी असून दक्षता खात्याकडून त्याची चौकशी करण्याची गरज फातोर्डाचे आमदार विजय सरदेसाई यांनी व्यक्त केली आहे.

मंगळवारी फातोर्डा येथील दोन नाल्यांची सफाई करण्याच्या कामाला सुरुवात करण्यात आली. त्यावेळी पत्रकारांशी बोलताना, सोपोच्या नावाखाली कंत्राटदाराने जे पैसे वसूल केले ते एसजीपीडीएत जमा झालेच नाहीत. या पैशांचे काय झाले त्याची चौकशी झालीच पाहिजे, असे ते त्यांनी सांगितले. सध्या एसजीपीडीएने पाच कोटींचे पाण्याचे बिल भरलेले नाही, याकडेही त्यांनी लक्ष वेधले. (Vijay Sardesai News)

सोनसोडो येथील इंनर्ट (टाकाऊ माती) घालून रवींद्र भवनसमोरील जी जागा भरली जात आहे, त्याचीही सरदेसाई यांनी पाहणी केली. अशा तऱ्हेने जागा भरण्यास प्रदूषण नियंत्रण मंडळानेही परवानगी दिली आहे. त्यामुळे लोकांनी या कामास विरोध करू नये, अशी मागणी त्यांनी केली. सोनसोडो येथील ही टाकाऊ माती कुठल्याही प्रकारे काढणे आवश्यक आहे. अन्यथा ती पावसात वाहून येऊन रस्त्यावर पडू शकते. तसे झाल्यास लोकांना त्रास होऊ शकतो. ज्यावेळी सोनसोडोवरील काम सुरू होईल, तेव्हा प्रत्येक आठवड्याला तिथे पाहणी करणार असल्याचे त्यांनी सांगितले.