Goa Congress

इंडिया आघाडीच्या नेत्यांनी आज काँग्रेस उमेदवारांच्या प्रचार शुभारंभाला उपस्थित राहून एकीचे दर्शन घडविले असले, तरी गिरीश चोडणकर, सुनील कवठणकर, फ्रान्सिस सार्दिन आणि विजय भिके हे उमेदवारीच्या शर्यतीत असलेले काँग्रेस नेते पत्रादेवी येथील कार्यक्रमाला उपस्थित नसल्याने तो चर्चेचा विषय बनला. काँग्रेसमध्येच दुही आहे का, अशी शंका उपस्थित करण्यात आली.

आज (मंगळवारी) स्थानिक पंच, सरपंच व तलाठी नंतर मडगाव येथे झालेल्या कार्यक्रमाला गिरीश चोडणकर यांनी हजेरी लावली.

पत्रादेवी येथील त्यांच्या गैरहजेरीबद्दल विचारले असता, मला त्या कार्यक्रमाची कुणीही कल्पना दिली नव्हती. लोहिया मैदानावर जो कार्यक्रम होता, त्याचेही आमंत्रण मला आज सकाळी 11 वाजण्याच्या सुमारास देण्यात आले, असे चोडणकर यांनी सांगितले.

चोडणकर यांनी दक्षिण गोवा लोकसभा उमेदवारीवर दावा केला होता; पण त्यांना तिकीट नाकारले होते. लोहिया मैदानावर त्यांनी उपस्थिती लावली; मात्र भाषण वगैरे काही केले नाही. याबद्दल विचारले असता, कार्यक्रमाची माहितीच मला उशिरा मिळाली.

सकाळी 11 वाजण्याच्या सुमारास प्रदेशाध्यक्ष अमित पाटकर यांचा मला फोन आला. तुम्ही लोहिया मैदानावर या, असे त्यांनी सांगितले. त्याप्रमाणे मी आलो, असे चोडणकर म्हणाले.

त्यापूर्वी आणखी एका वृत्तवाहिनीला दिलेल्या मुलाखतीत चोडणकर यांनी, मी पहिल्यांदाच पक्षाकडे उमेदवारी मागितली होती आणि निवडणुकीची तयारीही केली होती. पण पक्षाने मला उमेदवारी दिली नाही. कदाचित त्यांनी वेगळा विचार करून हा निर्णय घेतला असावा, असे म्हटले होते.