मूशीरवाडा-कोलवाळ येथे चार भंगारअड्ड्यांना भीषण आग लागल्याने कोट्यावधी रुपयांचे नुकसान झाले. रफान रिझवान खान यांच्या मालकीच्या भंगारअड्ड्यात सकाळी वेल्डिंगचे काम सुरू होते. त्यावेळी त्याची ठिणगी पडून ही आग लागल्याचे सांगण्यात आले. काही वेळात आगीने रौद्ररूप धारण करून इतर शेजारील भंगारअड्ड्यांमध्ये पसरली. बुधवारी सायंकाळपर्यंत म्हापसा, पिळर्ण, पर्वरी व पेडणे अग्नीशमन दलाचे मिळून 40 पेक्षा जास्त पाण्याचे बंब वापरले गेले होते.

दरम्यान, या आगीत एक कामगार गंभीर स्वरुपात जखमी झाला होता. यासीन शेख (56) असे त्याचे नाव आहे. जखमी झाल्याने रुग्णवाहिकेतुन त्याला म्हापसा येथील जिल्हा इस्पितळात दाखल करण्यात आले होते. मात्र, स्थिती गंभीर असल्याने त्याला गोमेकॉत पुढील उपचारार्थ हलवण्यात आले. तो जवळपास 70 टक्के भाजला होता. त्याची 3 दिवस मृत्युशी झुंज सुरु होती. अखेर त्याची झुंज अपयशी ठरली. उपचारादरम्यान त्याचा मृत्यु झाला आहे. याप्रकरणी मालकाविरुध्द सदोष मनुष्यवधाचा गुन्हा नोंद करण्यात आला आहे

या चारही भंगारअड्ड्यांत निरुपयोगी टाकाऊं वस्तू होत्या. ज्यामध्ये मोठ्या प्रमाणात खराब टायर, ट्यूब्स, १०० एसीचे संच, बॅरल, फायबर, पुटे, रासायनिक पदार्थ, वीजवाहिन्यांच्या तारा आदि साहित्य या आगीत भस्मसात झाले. ही आग पसरत असल्याने येथील कामगारांनी काही साहित्य तसेच महत्वांची कागदपत्रे बाहेर काढली. मात्र, हे प्रयत्न अपुरे पडले. कारण आगीने रौद्ररूप धारण केले होते.