मडगाव: घरगुती वादातून पतीकडून जबर मारहाण झालेली नसीम बी हिच्यावर गोमेकॉ इस्पितळात उपचार चालू असताना आज सकाळी मृत्यू झाल्याने पती अब्दुल रौफ याच्या विरुद्ध फातोर्डा पोलिसांनी खुनाचा गुन्हा नोंद केला. ही घटना 17 ऑगस्ट रोजी घडली होती.

(Injured woman dies during treatment in Margao Fatorda police registered a case )

मूळ होस्पेट येथील मात्र सध्या घोगळ हौसिंग बोर्ड येथे राहणाऱ्या अब्दुल रौफ याचे आपल्या पत्नीशी नेहमीच खटके उडायचे. असाच खटका 17 रोजी रात्री त्यांच्यात उडाला होता. त्यानंतर पत्नी झोपायला गेली असता रौफने तिच्या डोक्यात दांडा मारून जबर जखमी केले होते. त्यानंतर घरातून पळून जाण्याचा प्रयत्न करत असताना त्याला शेजाऱ्यांनी पकडून पोलिसांच्या स्वाधीन केले होते.

या प्रकरणी नंतर आरोपीच्याच मुलाने आपल्या वडिलांच्या विरोधात तक्रार केली होती. या प्रकरणी अटक केलेल्या आरोपीची कालांतराने तब्येत बिघडल्याने त्यालाही गोमेकॉ इस्पितळात दाखल करण्यात आले होते. या प्रकरणी जबर जखमी झालेल्या नसीम बीचा मृत्यूपूर्व जबानी घेण्याचा प्रयत्न फातोर्डा पोलिसांनी केला होता.

मात्र तिची प्रकृती जबानी देण्याइतपत सक्षम नसल्याने पोलिसांचा हा प्रयत्न यशस्वी होऊ शकला नाही. प्रारंभी या प्रकरणात खुनाचा प्रयत्न केल्याचा गुन्हा नोंद केला होता. मात्र आज नसीम बी हिच्या मृत्यूनंतर आरोपीवर खुनाचा गुन्हा नोंद केला आहे.