Industry Association Strike: कच्च्या मालाच्या किमती कमी करण्याच्या विषयात पंतप्रधान नरेंद्र मोदी यांनी हस्तक्षेप करावा, या मागणीसाठी गोवा राज्य उद्योग संघटनेने 20 डिसेंबर रोजी संप पुकारण्याचा निर्णय घेतला आहे. या संपात राज्यातील अडीच हजार लघु व सूक्ष्म उद्योजकांना सहभागी होण्याचे आवाहन संघटनेचे अध्यक्ष दामोदर कोचकर यांनी केले आहे.

• देशभरातील 10 लाख उद्योग होणार सहभागी

• राज्यातील अडीच हजार उद्योजकांचा सहभाग

• देशाला तब्बल 25 हजार कोटी रुपयांचा भुर्दंड

• उद्योग संघटनेचे पंतप्रधानांना साकडे

या आंदोलनांतर्गत संबंधित जिल्हाधिकारी, तसेच मामलेदार कार्यालयांसमोर शांततापूर्ण पद्धतीने एक तास निदर्शने केली जातील. सध्या कच्च्या मालाच्या किमती प्रचंड वाढल्या आहेत. याप्रश्नी पंतप्रधान मोदी (Narendra Modi) यांनी हस्तक्षेप करावा, अशी मागणी जोर धरू लागली आहे. या मागणीसाठी देशपातळीवर उद्योजकांनी संप (Strike) पुकारण्याचा निर्णय घेतला आहे. त्यांना गोवा राज्य उद्योग संघटनेने पाठिंबा देण्याचा निर्णय घेतला आहे.

या संपात देशभरातील 10 लाख लघु व सूक्ष्म उद्योग सहभागी होणार असून, यामुळे 25 हजार कोटी रुपयांचे नुकसान सहन करावे लागणार आहे. राज्यातील लघु व सूक्ष्म उद्योगांनी या संपात सहभागी व्हावे, असे आवाहनही कोचकर यांनी केले आहे.

एक तास निदर्शने :

20 डिसेंबर रोजी भारतातील सर्व उद्योग एक दिवसीय बंद पाळतील. कच्च्या मालाच्या किमती कमी करण्यासाठी पंतप्रधानांनी हस्तक्षेप करावा, यासाठी जिल्हाधिकारी/जिल्हा दंडाधिकारी कार्यालयासमोर एक तास निदर्शने करण्यात येतील. संपूर्ण भारतातील सुमारे 10 लाख एमएसएमई एआयसीएच्या या आवाहनाला पाठिंबा देण्यासाठी त्यांचे कामकाज एक दिवसासाठी बंद ठेवण्यात येणार आहे.

प्रमुख कामगार संघटनांचा सहभाग :

कोडीसिया, तनस्तिया, सीएमा, आयसीसीआयसी, आयआयएफ, अरिसे इत्यादी प्रमुख संघटना या एकदिवसीय बंद आणि निदर्शनात सहभागी होणार आहेत. पंजाब, हरियाणा, ओरिसा, आसाम, कर्नाटक या राज्यांतील एमएसएमई संघटना संपात सहभागी होणार आहेत. गुजरात, महाराष्ट्र, कर्नाटक, तामिळनाडू, आंध्र प्रदेश आणि मध्य प्रदेश येथील उद्योजक एक दिवस कामकाज बंद करून आम्हाला पाठिंबा देत आहेत, असे कोचकर यांनी सांगितले.