Mapusa Police Drug Raid in Anjuna: सडये-शिवोलीत म्हापसा पोलिसांकडून अमली पदार्थ विरोधी छापेमारी सुरू असतानाच गुरुवारी (ता.४) हुडोवाडो-शिवोली येथे हणजूण पोलिसांकडून अमली पदार्थ कारवाईत सूरज प्रदीप तोडी (२९, दांडा-शिवोली, मूळ बंगळुरू-कर्नाटक) याला ड्रग्स बाळगल्याप्रकरणी ताब्यात घेण्यात आले.

यावेळी त्याच्या ताब्यातील अंदाजे एक लाख रुपये किमतीचे एलएसडी पेपर्स व मारुती कार गाडी (एएस-०४/जी-३१८८) पोलिसांनी जप्त केली.

दरम्यान, ताब्यात घेतलेल्या संशयितांकडून जप्त करण्यात आलेला एलएसडी पेपर्स हणजूण येथील कालिदास ऊर्फ काली मधुकर नाईक (५०, सेंट ॲंथनी वाडा, हणजूण) याच्याकडून विकत घेतल्याची माहिती सूरज तोडी याने दिली.

त्यानंतर तत्काळ तपासाची चक्रे वेगळ्या दिशेने फिरवीत हणजूण पोलिसांनी शिस्तबद्ध सापळा रचून संशयित कालिदास नाईक याला अवघ्या दोन तासांत हणजूण येथून ताब्यात घेतले.

दरम्यान, हणजूण पोलिसांकडून संशयितांच्या विरोधात अमली पदार्थ विरोधी कायद्यानुसार रितसर गुन्हा दाखल करण्यात आला अाहे.

कळंगुटमध्येही एकावर कारवाई

परबवाडा-कळंगुट येथील बोडकेवड परिसरात कळंगुट पोलिस पथकाकडून माथियुर रेहमान (पश्चिम बंगाल) या मजुराच्या ताब्यातील बॅगची तपासणी केली असता अंदाजे 2 लाख 50 हजारांचा अमली पदार्थ पोलिसांच्या हाती लागला.

गुरुवारी (ता.४) दुपारी संशयावरून कळंगुट पोलिसांकडून ही कारवाई करण्यात आली. यात हेरॉईन २१ ग्रॅम (किंमत अंदाजे 2 लाख 10 हजार रुपये) तसेच एमडीएमए ४ ग्रॅम (किंमत अंदाजे ४० हजार रुपये) मिळून एकूण २ लाख ५० हजार रुपयांचा अमली पदार्थ यावेळी जप्त केला. कळंगुट पोलिसांकडून संशयित रहमान याच्याविरोधात गुन्हा दाखल करण्यात आला.