मडगाव येथील रवींद्र भवनने सुरु केलेल्या फिल्म क्लबचे उद्‍घाटन रविवार ३० जून रोजी किरण राव यांनी दिग्दर्शित केलेला "लापता लेडीज" या चित्रपटाने होणार आहे.

या चित्रपटात अभिनेत्री छाया कदम यांनी मंजू माई या पात्राची भूमिका केली आहे. सैराट, फॅंड्री, अंधाधुंद, मडगाव एक्स्प्रेस हे तिची भूमिका असलेले काही प्रसिद्ध चित्रपट आहेत.

ही माहिती रवींद्र भवनचे अध्यक्ष राजेंद्र तालक यांनी उपाध्यक्ष मनोहर बोरकर, सदस्य सचिव आग्नेल फर्नांडिस यांच्या उपस्थितीत दिली.

या फिल्म क्लबतर्फे प्रत्येक महिन्याच्या दुसऱ्या व चौथ्या शनिवारी इंग्रजी, मराठी, हिंदी, कोकणी व इतर भाषातील चित्रपटही प्रदर्शित केले जातील. शिवाय प्रेक्षकांना कलाकार, दिग्दर्शक, निर्माते यांच्याकडे थेट संवाद साधण्याची संधी मिळेल.

कदम यांच्याशी संवाद

या सोहळ्याला लापता लेडीज" चित्रपटातील अभिनेत्री छाया कदम उपस्थित राहणार आहे. चित्रपट समीक्षक व क्युरेटर सचिन चाटे तिच्याशी संवाद साधणार आहेत. हा कार्यक्रम सर्वांसाठी खुला असून काही आसने राखीव ठेवण्यात येतील.